नवी मुंबईतील गुडविन ज्वेलर्सचे पोलिसांनी तोडले टाळे

पीएमसी बँकेत ठेवीदारांचे कोट्यवधी रुपये अडकलेले असतानाच आता वाशिमधील गुडविन ज्वेलर्सकडून ग्राहकांची कोट्यवधी रुपयांची फसवणूक झाल्याचे उघड झाले आहे. एपीएमसी पोलिसांच्या माध्यमातून गुडविन ज्वेलर्सचे आज दुपारी टाळे तोडण्यात आले. मात्र, कोणत्याही प्रकारचे दागिने या ठिकाणी आढळून आले नसल्याची माहिती एपीएमसीचे वरिष्ठ पोलीस निरीक्षक सतीश निकम यांनी दिली आहे.

मुंबई- पीएमसी बँकेत ठेवीदारांचे कोट्यवधी रुपये अडकलेले असतानाच आता वाशीमधील गुडविन ज्वेलर्सकडून ग्राहकांची कोट्यवधी रुपयांची फसवणूक झाल्याचे उघड झाले आहे. याबाबत ग्राहकांच्या तक्रारीनंतर एपीएमसी पोलीस ठाण्यात गुडविन ज्वेलर्स विरोधात गुन्हा दाखल झाला आहे. वाशीतील सतरा प्लाझा भागातील गुडविनच्या दुकानाला टाळे लागल्याने गुंतवणूकदार हवालदिल झाले आहेत.

आज पोलिसांनी पंचासमक्ष गुडविन ज्वेलर्स या दुकानाचे टाळे तोडले. यावेळी फसवला गेलेला गुडविनचा ग्राहकवर्गही मोठ्या संख्येने उपस्थित होता. भिशी, मुदत ठेवी, हप्त्यावर सोने, यासारख्या योजनांद्वारे गुडविन ज्वेलर्सने कोट्यवधी रुपये गोळा केले. त्यानंतर दुकान अचानक बंद झाल्याने शेकडो गुंतवणूकदार चिंतेत सापडले आहेत. सुमारे २५ हजारांपासून ते २५ लाखांपर्यंत ग्राहकांनी गुंतवणूक केल्याचे सांगितले जात आहे.

नवी मुंबईतील ग्राहकांचे ७ कोटीपेक्षा अधिक रुपये घेऊन गुडविनच्या मालकांनी पोबारा केला आहे. एपीएमसी पोलिसांच्या माध्यमातून गुडविन ज्वेलर्सचे आज दुपारी टाळे तोडण्यात आले. मात्र, कोणत्याही प्रकारचे दागिने या ठिकाणी आढळून आले नसल्याची माहिती एपीएमसीचे वरिष्ठ पोलीस निरीक्षक सतीश निकम यांनी दिली आहे. तसेच ज्वेलर्समध्ये काही कागदपत्रे मिळतात का याचा पोलिसांच्या माध्यमातून शोध घेतला जात आहे. याप्रकरणी अधिक तपास एपीएमसी पोलीस ठाण्याचे पोलीस निरीक्षक सय्यद यांच्याकडून केला जात आहे.

हेही वाचा-शिवसेनेकडे असलेले संख्याबळ सभागृहात दाखवू - संजय राऊत