मुंबई- सीएसएमटी पूल दुर्घटनेप्रकरणी मुंबई महानगर पालिकेच्या आणखी एका मुख्य अभियंत्याला अटक करण्यात आली आहे. शितलाप्रसाद कोरी (५८) असे अटक करण्यात आलेल्या आरोपीचे नाव आहे. याप्रकरणात आतापर्यंत ही चौथी अटक करण्यात आली आहे. कोरी यांना मंगळवारी महानगर दंडाधिकारी न्यायालयात हजर केले असता न्यायालयाने आरोपीला १० मे पर्यंत पोलीस कोठडी सुनावली.
CSMT पूल दुर्घटना प्रकरणी चौथी अटक, मुख्य अभियंता शितलाप्रसाद कोरी गजाआड
सीएसएमटी पूल दुर्घटनेप्रकरणी मुंबई महानगर पालिकेच्या आणखी एका मुख्य अभियंत्याला अटक करण्यात आली आहे. शितलाप्रसाद कोरी (५८) असे अटक करण्यात आलेल्या आरोपीचे नाव आहे.
अटक आरोपी शितलाप्रसाद कोरी याच्याकडे हिमालय पूलाचा अहवाल आल्यानंतर त्याने स्वतः पुलाची पाहणी केली नव्हती. याबरोबरच सहायक अभियंता एस.एफ. कलकुलते व अनिल पाटील यांनी दिलेला अहवाल याने पडताळून पाहिला नव्हता, असे पोलिसांकडून न्यायालयात सांगण्यात आले. या संदर्भात आरोपीची अधिक चौकशी होणे गरजेचे असल्याने पोलिसांनी न्यायालयाकडे पोलीस कोठडीची मागणी केली. त्यानुसार न्यायालयाने आरोपीला १० मे पर्यंत पोलीस कोठडी सुनावली आहे.
आतापर्यंत याप्रकरणी आजाद मैदान पोलिसांच्या तपासात ३ आरोपींना अटक झाली होती. ज्यामध्ये ऑडीटर नितीन कुमार देसाई याच्यासह सहायक अभियंता एस.एफ. कुलकुलते, अनिल पाटील यांच्या अटकेनंतर या प्रकरणातील ही चौथी अटक आहे. हिमालय पूल दुर्घटनेत ७ जणांचा मृत्यू झाला होता. तर ३१ जण जखमी झाले होते. पोलीस चौकशीत या गुन्ह्यात ३०४/२ कल्पेबल होमिसाईड हा गुन्हा नोंद नव्याने जोडण्यात आला आहे.