मुंबई - कुर्ला पश्चिम साकिनाका येथील खाडी नंबर 3 वरील झोपड्यांना सकाळी आग लागली. ही आग लेव्हल 2 ची असली तरी तिला विझवायला तब्बल साडेतीन तासांचा अवधी लागल्याची माहिती मुंबई महापालिकेच्या आपत्कालीन व्यवस्थापन विभागाकडून देण्यात आली.
झोपड्यांना आग -
आज सकाळी पावणे नऊच्या सुमरास कुर्ला पश्चिम, साकिनाका, नेताजी रोड, 90 फूट रोडवरील, खाडी नंबर 3 सर्वोदय हॉटेल जवळील झोपड्यांना आग लागली. 10 ते 12 झोपड्यांना आग लागली. आगीची माहिती मिळताच अग्निशमन दल घटनास्थळी दाखल झाले. 9 फायर इंजिन, 7 जम्बो टँकर, 1 वॉटर टँकर, 2 क्विक रिस्पॉन्स घटनास्थळी तैनात करण्यात आली.
साकिनाका येथील झोपड्यांना आग आग विझवायला साडेतीन तास -
आगीवर नियंत्रण मिळवण्यासाठी मुंबई अग्निशमन दलाचे जवान प्रयत्न करत होते. लेव्हल 2 ची म्हणजेच कमी तीव्रतेची आग असली आग विझवायला साडे तीन तासांनी लागले. दुपारी 12. 15 वाजता आगीवर नियंत्रण मिळवण्यात मुंबई अग्निशमन दलाला यश आले आहे. या आगीत कोणीही जखमी झाले नसल्याची माहिती अग्निशमन दल व पालिकेच्या आप्तकालीन व्यवस्थापन विभागाने दिली.
हेही वाचा -नागपूर : शॉर्टसर्किटमुळे इलेक्ट्रॉनिक वस्तूंच्या दुकानाला आग
गेल्या काही महिन्यात मुंबईत लागलेल्या आगी
सेंट्रल मॉलला आग -
मुंबईत आग लागण्याचे सत्र सुरुच आहे. काही दिवसांपूर्वी मुंबई सेंट्रल, भायखळा, क्लॉसिक रोड, नागपाडा येथील सिटी सेंट्रल मॉलमध्ये आग लागली होती. या आगीवर नियंत्रण मिळवताना धुरामुळे एक जवान जखमी झाला होता. तसेच आगीवर नियंत्रण मिळवण्यासाठी अग्निशमन दलाचे तब्बल 250 अधिकारी कर्मचारी प्रयत्न करत होते. यावेळी या मॉलच्या बाजूला असलेली 55 मजली ऑर्किड एन्क्लेव ही इमारत खाली करण्यात आली होती.
दादर बाजार आग -
दादर परिसरातील बाजारपेठेत काही दिवसांपुर्वी भीषण आग लागली होती. या घटनेत कोणतीही जीवितहानी झाली नव्हती. अग्निशमन विभागाच्या मदतीने ही आग विझविण्यात आली होती. या आगीत बाजारातील काही दुकाने जळून खाक झाली आहे. शॉर्ट सर्किटमुळे ही आग लागल्याचे सांगण्यात आले होते.
पवईत हॉटेलला भीषण आग -
पवई आयआयटी मार्केट जंक्शन समोर असणाऱ्या एका हॉटेलला भीषण आग लागली होती. यामध्ये हॉटेल पूर्णपणे जळून भस्मसात झाले होते. या घटनेत कोणत्याही प्रकारची जीवितहानी झाली नव्हती मात्र मालमत्तेचे मोठे नुकसान झाले होते.
चेंबूर रेल्वे स्थानकाजवळील दुकानाला आग -
गेल्या महिन्यात हार्बर मार्गावरील चेंबूर स्थानकाजवळ असलेल्या मार्केटमधील एका दुकानाला पहाटे आग लागली होती. आगीवर अग्निशमन दलाने नियंत्रण मिळवले. या घटनेत कोणीही जखमी न झाल्याची माहिती पालिकेच्या आपत्कालीन व्यवस्थापन विभागाकडून देण्यात आली होती.
हेही वाचा -कल्याण पश्चिम येथील रेल्वे वसाहतीमधील कचऱ्याच्या ढिगाऱ्याला भीषण आग
