मुंबई -घाटकोपर येथील रमाबाई कॉलनीत राहणाऱ्या भार्गवी दुपारे या मुलीचा काही महिन्यांपूर्वी खासगी रुग्णालयात उपाचारादरम्यान मृत्यू झाला होता. यानंतर आपल्या मुलीच्या मृत्यूला रुग्णालय प्रशासनच जबाबदार असल्याचा आरोप मुलीच्या वडिलांनी केला आहे. त्यामुळे आज (बुधवार) मृत मुलीच्या वडिलांनी आणि नातेवाईकांनी भीम आर्मी संघटनेच्या सोबत रुग्णालय प्रशासनाच्याविरोधात आंदोलन केले.
हेही वाचा... कंपनीचा ई-मेल हॅक करून लाखोंची फसवणूक, अज्ञाताविरोधात गुन्हा दाखल
जेजे रुग्णालयामध्ये वैद्यकीय अभ्यासक्रमाच्या दुसऱ्या वर्षात शिकणारी भार्गवी नरेश दुपारे या मुलीला नातेवाईकांनी 13 जुलै रोजी रात्री दोन वाजता घाटकोपरच्या सपना हेल्थ केअर सेंटर या खासगी दवाखान्यात दाखल केले होते. त्यानंतर दुसऱ्याच दिवशी सकाळी तिची तब्येत अचानक बिघडली. रात्री मुलगी आमच्या सोबत व्यवस्थित बोलल्याचे नातेवाईकांनी सांगितले, मात्र तिच्यावर रुग्णालयातील डॉक्टरांनी योग्य प्रकारे उपचार केले नाहीत, त्यामुळे तिचा मृत्यू झाल्याचा आरोप मुलीच्या वडिलांनी केला आहे.