LIVE : उद्धव ठाकरे-शरद पवारांची बैठक संपन्न, तर हर्षवर्धन जाधवांनी केला राजकारणाला 'जय महाराष्ट्र'

19:16 May 23

मुंबई- कोरोनाचे संकट डोक्यावर असताना ऐन खरीपाच्या तोंडावर थकबाकीदार शेतकऱ्यांना दिलासा देणारा ऐतिहासिक आणि महत्त्वपूर्ण निर्णय महाविकास आघाडी सरकारने घेतला आहे. कर्जमाफीचा लाभ न मिळालेल्या पात्र शेतकऱ्यांचे थकीत कर्ज 'राज्य शासनाकडून येणे' दाखवून बँकांनी त्यांना खरीप हंगामासाठी नव्याने पीक कर्ज द्यावे, असे स्पष्ट आदेश सरकारने जारी केले आहेत.  

जिल्हा बँका तसेच व्यापारी आणि ग्रामीण बँकांना उद्देशून तसा शासन निर्णयही जारी करण्यात आला आहे. त्यामुळे थकबाकीदार शेतकऱ्यांना हंगामासाठी पीक कर्ज मिळण्याचा मार्ग मोकळा झाला आहे. या निर्णयाचा राज्यभरातील सुमारे अकरा लाख शेतकऱ्यांना लाभ होईल, असे सांगण्यात आले.  

15:57 May 23

मुंबई - राष्ट्रवादी काँग्रेस पक्षाचे अध्यक्ष खासदार शरद पवार आणि मुख्यमंत्री उद्धव ठाकरे यांनी राज्यातील कोविड-१९ च्या प्रादुर्भावाच्या अनुषंगाने आढावा बैठक घेतली. या बैठकीला जयंत पाटील यांच्यासह शिवसेना नेते खासदार संजय राऊत हेही उपस्थित होते. ही बैठक मुंबईत पार पडली. या बैठकीला मुख्य सचिव अजय मेहता यांच्यासह प्रशासकीय अधिकारी उपस्थित होते.  

15:55 May 23

संजय राऊत यांनी राज्यपाल भगतसिंह कोश्यारी यांची घेतली भेट...

मुंबई- राज्यात एकीकडे कोरोनाचा प्रादुभाव झपाट्याने वाढत असताना दिसून येत आहे. यावर राज्य सरकारकडून तातडीने उपाययोजना करण्यात येत आहेत. तर दुसरीकडे राज्याशी संबंधित विविध प्रश्नांवरून राज्यपाल आणि राज्य सरकारमध्ये तीव्र मतभेद दिसून येत आहेत. अशा परिस्थितीत आज शिवसेनेचे नेते खासदार संजय राऊत यांनी राज्यपाल भगतसिंह कोश्यारी यांची राजभवनमध्ये भेट घेतली.  

राऊत यांनी, राज्यपाल आणि मुख्यमंत्री यांचे संबंध अत्यंत मधुर आहेत. दोघांना एकमेकांविषयी आदर आणि प्रेम आहे. राज्यपाल आणि मुख्यमंत्री यांचे संबंध अगदी पिता पुत्राचे असावेत तसेच आहेत, असे सांगितले आहे. तसेच त्यांनी, राज्यपाल हे आमचे मार्गदर्शक आहेत. खूप दिवस त्यांना भेटलो नव्हतो म्हणून ही सदिच्छा भेट असल्याचे स्पष्टीकरण दिले.

15:54 May 23

औरंगाबाद जिल्ह्यातील कन्नडचे माजी आमदार हर्षवर्धन जाधव यांनी राजकारणातून निवृत्ती घेतली आहे. त्यांनी सोशल मीडियावर एक व्हिडिओ शेअर करत आपल्या राजकीय संन्यासाची घोषणा केली आहे.  

हर्षवर्धन जाधव दोन वेळा कन्नडचे आमदार राहिले होते. ते केंद्रीय मंत्री रावसाहेब दानवेंचे जावईदेखील आहेत. हर्षवर्धन यांनी संन्यास घोषित करताना आपला राजकीय उत्तराधिकारी म्हणून पत्नी संजना जाधव यांचे नाव घोषित केले आहे.  

15:20 May 23

मुंबई -शिवसेनेचे नेते संजय राऊत यांनी राज्यपाल भगतसिंह कोश्यारी यांची राजभवनात भेट घेतली. तर याशिवाय आज औरंगाबाद जिल्ह्यातील कन्नडचे माजी आमदार हर्षवर्धन जाधव यांनी राजकारणातून संन्यास घेत असल्याची घोषणा केली. तर कोरोनाच्या राज्यातील वाढत्या संसर्गाच्या अनुषंगाने मुख्यमंत्री उद्धव ठाकरे, राष्ट्रवादीचे अध्यक्ष शरद पवार आणि जयंत पाटील यांची महत्वपूर्ण बैठक पार पडली आहे. या सारख्या राज्यभरातील महत्वपूर्ण घडामोडींचा लाईव्ह आढावा....