Eknath Shinde On Online Transfer : बदल्यामधील भ्रष्टाचारावर ऑनलाइन उतारा; परिवहन विभागातील बदल्या पहिल्यांदाच झाल्या ऑनलाईन, मुख्यमंत्री म्हणाले . . .

Eknath Shinde On Online Transfer : राज्य सरकारच्या वतीनं विविध खात्यांतर्गत करण्यात येणाऱ्या बदल्यांमध्ये मोठ्या प्रमाणात आर्थिक देवाण-घेवाण होत असल्याच्या तक्रारी सातत्यानं समोर येतात. बदल्यांमधील या भ्रष्टाचारावर उपाय म्हणून आता परिवहन विभागानं अधिकाऱ्यांच्या आणि कर्मचाऱ्यांच्या बदल्या ऑनलाइन पद्धतीनं करण्याचा निर्णय घेतला आहे. त्यामुळे भ्रष्टाचाराला कुठेही वाव न राहून पारदर्शक कारभार होईल, असा दावा मुख्यमंत्री एकनाथ शिंदे यांनी केला.

मुंबई Eknath Shinde On Online Transfer : राज्य परिवहन विभागातील मोटार वाहन निरीक्षक आणि सहायक मोटार वाहन निरीक्षकांच्या बदल्या आता ऑनलाईन करण्याचा निर्णय मुख्यमंत्री एकनाथ शिंदे यांनी घेतला आहे. बुधवारी सह्याद्री अतिथीगृह इथं झालेल्या बैठकीत मुख्यमंत्री एकनाथ शिंदे यांच्या हस्ते कळ दाबून बदलीपात्र अधिकाऱ्यांची संगणकीय यादी जाहीर करण्यात आली. या यंत्रणेच्या माध्यमातून पूर्णत: पारदर्शकपणे आणि मानवी हस्तक्षेपाशिवाय बदल्यांची कार्यवाही होईल, असा दावा मुख्यमंत्री एकनाथ शिंदे यांनी केला आहे.

• मोटार वाहन निरीक्षकांच्या बदल्यांची अंतिम यादी :मुख्यमंत्री एकनाथ शिंदे यांच्या हस्ते 166 मोटार वाहन निरीक्षक आणि 314 सहायक मोटार वाहन निरीक्षकांच्या बदलीची अंतिम यादी तयार करण्यात आली. 166 मोटार वाहन निरीक्षकांपैकी 91 टक्के तर 314 सहायक मोटार वाहन निरीक्षकांपैकी 97 टक्के बदल्या पसंती क्रमानुसार करण्यात आल्या आहेत.

पारदर्शक बदल्यांसाठी ऑनलाईन प्रणाली विकसित:परिवहन विभागातील बदल्या प्रसार माध्यमांमध्ये आणि विधीमंडळाच्या अधिवेशनांमध्ये चर्चेत राहत होत्या. त्यावर उपाय म्हणून मुख्यमंत्री एकनाथ शिंदे यांनी पारदर्शकपणे बदल्या करण्यासाठी संगणीकृत करण्याचे निर्देश दिले होते. त्यानुसार विभागानं ही प्रणाली विकसीत केली. त्याचं सादरीकरण विभागाचे प्रधान सचिव पराग जैन यांनी बैठकीत केलं.

राज्यभर समप्रमाणात पदे भरली जाणार :परिवहन विभागाच्या काही विभागातील कार्यालांमध्ये निरीक्षक आणि सहायक निरीक्षक ही पदं रिक्त होती. आता या प्रणालीच्या माध्यमातून राज्यभर समप्रमाणात पदे भरली जाणार आहेत. त्यासाठी बदलीपात्र अधिकाऱ्यांकडून तीन पसंती क्रमाचे ठिकाण ऑनलाईन मागवण्यात आले आहेत. त्यानुसार यावर्षी बदलीपात्र अधिकाऱ्यांमध्ये 166 मोटार वाहन निरीक्षक आणि 314 सहायक मोटार वाहन निरीक्षकांचा समावेश होता. त्यांची ऑनलाईन पद्धतीनं अंतिम यादी बुधवारीच्या या बैठकीत तयार करण्यात आली. 166 मोटार वाहन निरीक्षकांपैकी 100 जणांना प्रथम पसंती क्रमानुसार, 35 जणांना द्वितीय पसंती क्रमानुसार, 15 जणांना तृतीय पसंती क्रमानुसार तर 16 जणांची यादृच्छिकपणे (Random) बदली देण्यात आली आहे.

हेही वाचा :