मुंबई- राज्यात भेलपुरी-पाणीपुरीसह उघड्यावर पदार्थ विकणाऱ्यांना यापुढे ड्रेस आणि ठराविक प्रकारचे हातमोजे घालणे सक्तीचे केले जाणार असल्याची माहिती अन्न व औषध प्रशासन मंत्री डॉ. राजेंद्र शिंगणे यांनी आज विधानपरिषदेत दिली. विधानसभेने मंजूर केलेले अन्न सुरक्षा व मानके (महाराष्ट्र सुधारणा) विधेयक-२०२० हे आज विधानपरिषदेत संमत करण्यात आले. त्यावेळी त्यांनी ही माहिती दिली.
राज्यात भेसळखोरांच्या विरोधात आलेल्या तक्रारींवर आयुक्तांनी आठ दिवसाच्या आत कारवाई करण्याची सुधारणा या विधेयकात करण्यात आली असल्याचेही डॉ. राजेंद्र शिंगणे यांनी सांगितले. अन्न सुरक्षा व मानके विधेयकावर सत्ताधारी आणि विरोधीपक्षाच्या सदस्यांनी भेसळखोरांवर कठोर कारवाईची मागणी केली होती. त्यावर, मंत्री डॉ. राजेंद्र शिंगणे म्हणाले की, अन्न व औषध प्रशासन हा विभाग राज्यातील जनतेच्या जगण्याशी संबंधित विभाग आहे. त्यामुळे, राज्यातील प्रत्येक नागरिकांना चांगले आणि शुद्ध अन्न मिळाले पाहिजे. या सर्व बाबींचा या विधेयकात विचार करण्यात आला आहे. हे विधेयक मागच्या सरकारचेच आहे. मागील काळातच हे विधेयक सरकारने आणले होते. परंतु, आचारसंहितेमुळे ते थांबले होते, असे डॉ. राजेंद्र शिंगणे यांनी सांगितले.