मुंबई-राज्य मंत्रिमंडळातील तिसरे मंत्री कोरोना पॉझिटिव्ह आढळले असून आरोग्य मंत्री राजेश टोपे यांनी आज त्यावर स्पष्टीकरण दिले. सामाजिक न्यायमंत्री धनंजय मुंडे यांना कोरोनाची लागण झाली असून त्यांना ब्रीच कँडी रुग्णालयात दाखल करण्यात येणार आहे. धनंजय मुंडे यांची प्रकृती स्थिर असून, त्यांना कोणतीही लक्षणं नाहीत. श्वसनाचा त्रास झाल्याने त्यांना रुग्णालयात दाखल करत आहोत, असे टोपे यांंनी सांगितले.
धनंजय मुंडे यांच्याबद्दल बोलताना आरोग्यमंत्री राजेश टोपे धनंजय मुंडे यांचा एक अहवाल निगेटिव्ह, तर दुसरा पॉझिटिव्ह आला आहे. यानंतर त्यांनी माझ्याशी संपर्क साधला. त्यांना कोणतीही लक्षणं जाणवत नसून श्वसनाचा त्रास होत आहे. यासाठीच आम्ही त्यांना ब्रीच कँडी रुग्णालयात दाखल करण्याचे ठरवले असून त्यासाठीची तयारी पूर्ण झाली आहे. मुंडे फायटर आहेत, लवकरच बरे होतील आणि पुन्हा एकदा सक्रिय होतील, असा विश्वासही टोपेंनी व्यक्त केला. धनंजय मुंडे मंत्रिमंडळाच्या बैठकीला आणि पक्षाच्या वर्धापन दिनाच्या कार्यक्रमात उपस्थित होते. मात्र, या कार्यक्रमात मंत्रिमंडळाची लोक सुरक्षेच्या अंतरावर होते. वर्धापन दिनाचा कार्यक्रमही पाच मिनिटांचा होता. यावेळी कोणतेही भाषण देण्यात आले नाही. ध्वजारोहण करतानाही फक्त पाच लोक उपस्थित होते. या कार्यक्रमाला उपस्थित असलेल्यांपैकी कोणालाही कोरोनाची लक्षणे जाणवलेली नाहीत. आयसीएमआरच्या गाइडलाइनप्रमाणे लक्षणे नसतील, तर चाचणी करण्याचा विषय येऊ शकत नाही.
दरम्यान, महाविकास आघाडीमध्ये काँग्रेस नाराज असल्याच्या बातम्या येत आहेत. यावर बोलताना टोपे म्हणाले की, राज्य सरकारमधील मंत्री बाळासाहेब थोरात हे काँग्रेसचे सर्वात अनुभवी आणि ज्येष्ठ आमदार मंत्री आहेत. मंत्रिमंडळातील सर्व सदस्य एकदिलाने काम करत आहेत. संकटाच्या काळात नाराजी किंवा खदखद असा विषयच नाही.
राज्यातील वैद्यकीय डॉक्‍टरांच्या भरतीबाबत प्रक्रिया सुरू असून याबाबत ऑनलाइन मुलाखती घेण्याचे नियोजन आहे, असेही टोपे यांनी सांगितले.
