मुंबई - ६ डिसेंबर रोजी महापरिनिर्वाण दिन आहे. या पार्श्वभूमीवर चैत्यभूमी येथे सुरू असलेल्या नियोजनाची, तसेच इंदू मिल येथे डॉ. बाबासाहेब आंबेडकर यांच्या आंतरराष्ट्रीय स्मारकाच्या बांधकामाची सामाजिक न्यायमंत्री धनंजय मुंडे यांनी आज पाहाणी केली.
डॉ. बाबासाहेब आंबेडकर यांचे स्मारक मार्च २०२३ च्या अगोदर नागरिकांसाठी खुले केले जाईल. स्मारकाचा लोकार्पण सोहोळा २०२३ साली केला जाईल. यासाठीची तयारी सुरू असल्याची माहिती मुंडे यांनी दिली. आंबेडकर स्मारकाच्या तळमजल्याचे काम पूर्ण झाले असून, मुख्य प्रवेशद्वार आमच्या सूचनेनंतर साडेसहा फुटावर नेण्यात आले आहे. इतर कामे ही वेगात असल्याची माहितीही मुंडे यांनी दिली.
मुंडे यांनी आंबेडकर स्मारक समितीच्या मुख्य पदाधिकाऱ्यांसोबत भेट घेऊन एकूणच लोकार्पण सोहोळ्यापूर्वी स्मारकाच्या बांधकामाचा कोणता टप्पा सुरू आहे, याचाही आढावा घेतला. हे सर्व काम दोन महिने अगोदर म्हणजेच, मार्च २०२३ पूर्वी झाले पाहिजे, अशा सूचनाही त्यांनी दिल्या. तर, महापरिनिर्वाण दिनाच्या पार्श्वभूमीवर राज्यातील आंबेडकरी जनतेनी कोरोनाचा धोका लक्षात घेऊन चैत्यभूमी येथे गर्दी करू नये, असे आवाहनही मुंडे यांनी केले.