मुंबई - गेल्या वर्षी कोरेगाव भीमा येथे झालेल्या हिंसाचार प्रकरणी ज्यांच्यावर गुन्हे दाखल करण्यात आले आहेत, ते सर्व खटले मागे घेण्याच्या बाबतीत मुख्यमंत्री उद्धव ठाकरे सकारात्मक असल्याचे मुंबई काँग्रेसचे अध्यक्ष एकनाथ गायकवाड यांनी म्हटले आहे. आज काँग्रेसच्या शिष्टमंडळाने मुख्यमंत्री उद्धव ठाकरे यांची मंत्रालयात भेट घेतली, त्याप्रसंगी ते माध्यमांसोबत बोलत होते.
हेही वाचा -भिमा-कोरेगावसह मराठा मोर्चा आंदोलकांवरील गुन्हे मागे घ्या, अन्यथा निदर्शने
तसेच, कोरेगाव भीमा प्रकरणी शिवप्रतिष्ठानचे संस्थापक संभाजी भिडे आणि मिलिंद एकबोटे यांच्यावर गुन्हे दाखल असूनही कारवाई झालेली नाही. त्यामुळे त्यांच्यावर कारवाई व्हावी, अशी मागणी केल्याचेही गायकवाड यांनी स्पष्ट केले आहे. यासोबतच, काँग्रेसच्या शिष्टमंडळाने पंजाब बँकेच्या खातेदारांना दिलासा देण्यासाठी केंद्राने त्यांचे पैसे द्यावेत; अथवा ही बँक इतर बँकेत विलीन करावी आणि यातून मार्ग काढावा, अशी मागणी केल्याचेही गायकवाड यांनी सांगितले आहे.
