मुख्यमंत्री पदाचा उमेदवार अद्याप ठरलेला नाही, चंद्रकांत पाटलांचा शिवसेनेला टोला

मुख्यमंत्री पदाचा उमेदवार अद्याप ठरलेला नाही, असे सांगत भाजप प्रदेशाध्यक्ष चंद्रकांत पाटील यांनी शिवसेनेला टोला लगावला आहे.

मुंबई- सत्ताधारी शिवसेना भाजपच्या महायुतीवर दोन्ही पक्षाच्या नेत्यांनी शिक्कामोर्तब केले असले तरी मुख्यमंत्री पदाबाबत अजूनही संभ्रम कायम आहे. मुख्यमंत्री पदाचा उमेदवार अद्याप ठरलेला नाही, असे सांगत भाजप प्रदेशाध्यक्ष चंद्रकांत पाटील यांनी शिवसेनेला टोला लगावला आहे. मुख्यमंत्री देवेंद्र फडणवीस राज्यात १ ऑगस्ट पासून महाजनादेश यात्रा काढणार आहेत. या संदर्भात माहिती देताना पाटील बोलत होते.

एकीकडे मुख्यमंत्री देवेंद्र फडणवीस महाजानदेश यात्रेवर जात असतानाच दुसरीकडे शिवसेना युवा सेनेचे अध्यक्ष आदित्य ठाकरे जन आशीर्वाद यात्रेद्वारे महाराष्ट्र पिंजून काढत आहेत. या यात्रेदरम्यान शिवसेनेकडून आदित्य ठाकरे यांच्याकडे शिवसेनेचा मुख्यमंत्री पदाचा दावेदार म्हणून पहिले जात आहे. यावर पाटील यांनी महायुतीचा मुख्यमंत्री पदाचा उमेदवार ठरला नाही. लवकरच याबाबत निर्णय होईल, असे सांगत सेनेला टोला लगावला.

प्रत्येक पक्ष महत्वाकांक्षी असतो त्याचप्रमाणे भाजपही आहे. शिवसेनेने मुख्यमंत्री पदाचा उमेदवार जर निश्चित केला असेल तर त्यात काहीही गैर नाही, असेही पाटील यावेळी म्हणाले. गेल्या 5 वर्षात महायुतीच्या सरकारने जनतेचे जीवन सुसह्य करण्यासाठी काम केले आहे. आता हेच केलेले काम जनतेत मिसळून सांगण्यासाठी मुख्यमंत्रांच्या महाजनादेश यात्रेचे आयोजन केले आहे. लोकशाहीर अण्णाभाऊ साठे यांची जयंती तर लोकमान्य टिळक यांच्या पुण्यतिथीचे औचित्य साधत येत्या 1 ऑगस्टला संत तुकडोजी महाराजांचे जन्मस्थान असलेल्या अमरावती जिल्ह्यातील 'मोझर' येथून या यात्रेला सुरुवात होणार असल्याची माहिती पाटील यांनी दिली.

विदर्भ आणि उत्तर महाराष्ट्र येथे 1 ते 9 ऑगस्ट दरम्यान यात्रेचा पहिला टप्पा होणार आहे. या भागातील एकूण 14 जिल्ह्यात ही यात्रा जाणार आहे. या दरम्यान 57 विधानसभा मतदार संघातून 1 हजार 639 किलोमीटरचा प्रवास करण्यात येणार आहे. पहिल्या टप्प्याचा समारोप नंदुरबार येथे होणार आहे. तर यात्रेचा दुसरा टप्पा 17 ऑगस्ट रोजी सुरु होईल.

दुसऱ्या टप्प्यात ही यात्रा 18 जिल्ह्यातल्या 93 विधानसभा मतदारसंघात 2 हजार 745 किलोमीटर एवढा प्रवास करणार आहे. यात्रेचा एकूण प्रवास 32 जिल्ह्यांतून 4 हजार 384 किलोमीटर एवढ्या अंतराचा असणार आहे. दोन्ही टप्पे मिळून 150 विधानसभा मतदारसंघांमधून ही यात्रा जाणार आहे. यादरम्यान 87 मोठ्या सभा, 57 स्वागत सभा होणार आहेत. याशिवाय एकूण 238 पेक्षा अधिक गावांमध्ये स्वागत स्वीकारून यात्रा नाशिक येथे पोहोचेल. या यात्रेचे प्रमुख प्रदेश सरचिटणीस आमदार सुजितसिंह ठाकूर असणार आहेत.

मुख्यमंत्र्यांच्या महाजानदेश यात्रेच्या सुरुवातीला भाजपचे राष्ट्रीय अध्यक्ष अमित शाह यात्रेत येणार असल्याचे सांगण्यात आले होते. मात्र, संसदेचे कामकाज सुरु असल्याने शाह येणार की नाही? याबाबत अनिश्चितता आहे. तसेच, यात्रेच्या समारोपाला देशाच्या पंतप्रधान नरेंद्र मोदी यावेत यासाठीही प्रदेश भाजपकडून प्रयत्न केले जात असल्याचेही प्रदेशाध्यक्ष पाटील यांनी सांगितले.