सीबीआयकडून रियासह तिचे वडील इंद्रजीत चक्रवर्तींना समन्स; मात्र रियाच्या वकिलांनी फेटाळला दावा

बांद्रा पोलिसांकडून मिळालेले पुरावे, सुशांतसिंहचे ३ मोबाईल फोन, डायरी, कपडे आणि तब्बल ५६ लोकांचे जवाब या सर्व गोष्टी घेतल्यानंतर आता पुढच्या टप्प्यात रिया चक्रवर्ती आणि तिचे वडील इंद्रजीत चक्रवर्ती यांना चौकशीसाठी समन्स पाठविण्यात आले आहे. मात्र, हा दावा रियाच्या वकिलांनी फेटाळून लावला आहे.

मुंबई- सुशांतसिंह राजपूत आत्महत्येप्रकरणी सीबीआयच्या टीमकडून चौकशी केली जात आहे. आतापर्यंत सुशांतचा स्वयंपाकी नीरज सिंह, हाऊस किपींग कर्मचारी दीपेश सावंत, हाऊस मॅनेजर सॅम्युअल मिरांडा, सुशांतचे चार मित्र, सिद्धार्थ पिठानी याच्यासह सुशांतचा घरमालक संजय लालवाणी यांची चौकशी करण्यात आली आहे. आता सीबीआयने सुशांतची मैत्रीण रिया चक्रवर्ती आणि तिच्या वडिलांना चौकशीसाठी समन्स पाठविले आहे, अशी माहिती सूत्रांनी दिली आहे. मात्र, हा दावा रिया चक्रवर्तीच्या वकिलांनी फेटाळून लावला आहे. रियाला तसेच कुटुंबीयांना सीबीआयने अद्याप कोणतेही समन्स पाठविले नाही, असे त्यांनी स्पष्ट केले आहे.


सुशांतच्या मृत्यूप्रकरणी सीबीआयच्या पथकाने शनिवारी बांद्रास्थित सुशांतच्या घरी जाऊन घडलेल्या घटनेचे रिक्रिएशन केले आहे. यावेळी सुशांतच्या घरातील कुक नीरज सिंह, हाऊस किपींग कर्मचारी दीपेश सावंत, हाऊस मॅनेजर सॅम्युअल मिरांडा, सुशांतचे चार मित्र सिद्धार्थ पिठानी हे चौघेही सीबीआयच्या टीमसोबत हजार होते. यानंतर सीबीआयच्या दुसऱ्या पथकाने कूपर रुग्णालयातील अधिष्ठाता डॉ. पिनाकीन गुज्जर यांची परवानगी घेऊन सुशांतच्या पोस्टमॉर्टम रिपोर्टवर स्वाक्षरी करणाऱ्या डॉ. सचिन सोनावणे, डॉ. शिवकुमार कोले, डॉ. संदीप इंगळे, डॉ. प्रवीण खंडारे व डॉ. गणेश पाटील यांची चौकशी केली आहे. यानंतर बांद्रा पोलिसांकडून मिळालेले पुरावे, सुशांतसिंहचे ३ मोबाईल फोन, डायरी, कपडे आणि तब्बल ५६ लोकांचे जवाब या सर्व गोष्टी घेतल्यानंतर आता पुढच्या टप्प्यात रिया चक्रवर्ती आणि तिचे वडील इंद्रजीत चक्रवर्ती यांना चौकशीसाठी समन्स पाठविण्यात आले आहे.

दरम्यान, सीबीआयकडून सुशांतची मैत्रीण रिया चक्रवर्ती व तिचे वडील इंद्रजीत चक्रवर्ती यांना चौकशीसाठी समन्स बजावण्यात आल्याचे सीबीआय सूत्रांनी सांगितले होते. त्यांच्या या दाव्याचे खंडन रिया चक्रवर्तीच्या वकिलांनी केले आहे. आतापर्यंत रिया चक्रवर्ती व कुटुंबाला कुठल्याही प्रकारचे समन्स आले नाही. तसेच चौकशीचे समन्स आल्यास रिया व तिचे कुटुंब चौकशीसाठी हजर होतील, असेदेखील रियाच्या वकिलांनी स्पष्ट केले आहे. एक जवाबदार व्यक्ती म्हणून रिया व तिचे कुटुंबीय मुंबई पोलीस व ईडीकडे चौकशीसाठी हजर झाले होते. त्यानुसार सीबीआयच्या चौकशीला ते हजर राहतील, असे सांगण्यात आले आहे.

सुशांतसिंह राजपूत प्रकरणी सीबीआय तपास करीत असून त्यांच्या मदतीसाठी आणखी एक पथक दिल्लीतून मुंबईत लवकरच येणार असल्याचे सीबीआय सूत्रांकडून कळत आहे. येस बँक घोटाळ्याप्रकरणी येस बँकेचा संस्थापक राणा कपूर हा सध्या सीबीआयच्या न्यायालयीन कोठडीत आहे. त्याची चौकशी करण्यासाठी सीबीआयचे एक पथक मुंबईत दाखल होणार आहे. या सीबीआय पथकाची मदत सुशांतसिंह प्रकरणात घेणार असल्याचे सीबीआयच्या वरिष्ठ अधिकाऱ्याने स्पष्ट केले आहे.

सुशांतसिंह नेहमी जात असलेल्या रिसॉर्टवर सीबीआय चौकशीसाठी दाखल -

सुशांतसिंह त्याचे जवळचे मित्र आणि कर्मचारी स्टाफसोबत वॉटर स्टोन रिसॉर्टवर नेहमी जात असे. त्यामुळे वॉटर स्टोन रिसॉर्टवर सीबीआयच्या पथकाने भेट देऊन त्या ठिकाणी तब्बल दोन तास चौकशी केलेली आहे. या रिसॉर्टवर जेवढा वेळ सुशांतसिंहने घालवला होता त्यावेळेस त्याची मानसिक वर्तणूक कशी होती? ज्या ज्या वेळेस सुशांत या रिसॉर्टवर आला त्यावेळेस सुशांतसोबत कोण होतं? या रिसॉर्टवर आल्यानंतर रिसॉर्टच बिल कोणी भरलं होतं? सुशांतसिंहसोबत रिया चक्रवर्ती नेहमी या रिसॉर्टवर नेहमी येत होती का? याचाही तपास सीबीआय अधिकारी करत आहेत. ज्या दिवशी सुशांतसिंह या रिसॉर्टवर आला होता, त्या दिवशीचे सीसीटीव्ही फुटेज सीबीआयचे पथक तपासत आहे. या रिसॉर्टच्या काही कर्मचाऱ्यांचे जबाब सीबीआयने नोंदवले आहेत.

दरम्यान, सुशांतचा मित्र सिद्धार्थ पिठानी याची रविवारी सीबीआयने चौकशी केली आहे. 13 व 14 जून रोजी सिद्धार्थ पिठानी हा सुशांतसोबत पूर्ण वेळ होता. 14 जून रोजी सुशांत त्याच्या रूमच्या दरवाजा उघडत नसल्याचे लक्षात येताच सिद्धार्थ यानेच याबद्दल सुशांतची बहीण मितु सिंहला कळविले होते. सुशांतच्या रूमचा दरवाजा उघडण्यासाठी सिद्धार्थनेच चावी बनविणाऱ्या व्यक्तीला बोलवून त्यास दरवाजा उघडण्याचे 2000 हजार दिले होते. मात्र, हा दरवाजा उघडताच चावी बनविणाऱ्या व्यक्तीला घरातून तत्काळ निघून जाण्यास सांगितले होते. सुशांतच्या घरी आठवड्यातून 2 वेळा पार्टी केली जात असे. यावेळी सिद्धार्थ पिठानी हा तिथे असायचा. या पार्टीत सिद्धार्थ पिठानीने काही वेळा सुशांतला गांजा ओढण्यासाठी रोल बनवून दिले होते, असे सुशांतचा कुक नीरज सिंह याने त्याच्या जबाबात म्हटले आहे.