कर्करोगग्रस्त विद्यार्थिनीने दिली टाटा रुग्णालयातून दहावीची परीक्षा

दहावीची परीक्षा देत असलेली कर्करोगग्रस्त विद्यार्थिनी अचानक आजारी पडली होती. विद्यार्थिनीची परीक्षा देण्याची इच्छा असल्याने आज परीक्षा केंद्र अधिकाऱ्यांनी या विद्यार्थिनीला तिची व्यवस्था परळ येथील टाटा कर्करोग रुग्णालयात केली होती.

मुंबई - राज्यात दहावी बोर्डाच्या परीक्षा चालू असून मुंबईतील एक दहावीची परीक्षा देत असलेली कर्करोगग्रस्त विद्यार्थिनी अचानक आजारी पडली होती. विद्यार्थिनीची परीक्षा देण्याची इच्छा असल्याने आज परीक्षा केंद्र अधिकाऱ्यांनी या विद्यार्थीनीला तिची व्यवस्था परळ येथील टाटा कर्करोग रुग्णालयात केली होती. पेपर दिल्यानंतर या विद्यार्थिनीने परीक्षा केंद्र अधिकाऱ्यांचे आभार मानले.

मुंबईच्या वांद्रे येथील माउंट मेरी शाळेची मालिक सगिरा जेद अली ही विद्यार्थीनी दहावीची परीक्षा देत असून. तिचे माहीम येथील कनोसा विद्यालय हे परीक्षा केंद्र आले आहे. या विद्यार्थीनी कर्करोग बाधित आहे. या आजारावर मात करत ती दहावीची परीक्षा देत आहे. शाळेच्या विनंतीनुसार मंडळाने तिला रायटर आणि परीक्षेसाठी अधिक वेळ देण्याचा निर्णय घेतला आहे. शुक्रवारी या विद्यार्थीनीला अचानक रुग्णालयात दाखल करावे लागले होते. त्यामुळे तिची परीक्षा रुग्णालयात घेण्याबाबत कनोसा शाळेतील अधिकाऱ्यांनी मंडळाला सकाळी 10 वाजता विनंती केली. विद्यार्थिनीची परीक्षा देण्याची इच्छा आणि अधिकाऱ्यांचा पाठपुरावा पाहता, मंडळाने तातडीने या विद्यार्थिनीसाठी परीक्षक, पोलीस, रायटर आदी आवश्‍यक बाबी पुरविल्या.

हेही वाचा -कोरोनाचा प्रभाव.. आयआयटी मुंबईतील सर्व तासिका रद्द; विद्यार्थ्यांना घरी जाण्याची परवानगी

आज या विद्यार्थिनीचा गणित पेपर-२ होता. विभागीय मंडळ आणि टाटा रुग्णालयाने विद्यार्थिनीस परीक्षा देण्याची व्यवस्था केल्याने रुग्णालयात पेपर देता आला. विद्यार्थिनीचे शैक्षणिक नुकसान होऊ नये, यासाठी विभागीय मंडळाने परीक्षा गांभिर्याने घेतली. या परीक्षेवेळी सुरक्षेची काळजी घेण्यात आली. त्याचप्रमाणे या विद्यार्थिनीसमोर पेपर खुले करण्यात आल्याचे, मुंबई विभागीय सचिव संदीप सांगवे यांनी सांगितले.