मुंबई- शहरातील डोंगरी भागात इमारत कोसळल्याची दुर्घटना घडल्यानंतर आता सगळ्याच महापालिका जाग्या झाल्या आहेत. महापालिकांनी अतिधोकादायक बांधकामांवर हातोडा सत्र सुरू केले आहे. डोंगरी सारख्या घटना घडू नयेत म्हणून अशा प्रकारच्या कारवायांना गती मिळाली आहे.
ठाण्यातील हरी निवास सर्कल येथील खंडू निवास या अतिधोकादायक इमारतीवर बुधवारी तोडक कारवाई करण्यात आली. ठाणे महापालिकेच्या वतीने केवळ नौपाडा प्रभागात एकूण 46 इमारती अतिधोकादायक म्हणून घोषित करण्यात आल्या आहेत. त्यापैकी 42 इमारती तातडीने खाली करण्यात आल्या आहेत. या तोडक कारवाईमध्ये आतापर्यंत आठ इमारतींवर हातोडा चालविण्यात आल्याची माहिती सहाय्यक आयुक्त मारुती गायकवाड यांनी दिली.