कॉर्पोरेट हब असलेले बीकेसी कोरोनाचे नवे हॉटस्पॉट, महिनाभरात ६० पॉझिटिव्ह

मुंबईतील कॉर्पोरेट हब असलेले वांद्रे-कुर्ला कॉम्प्लेक्स म्हणजेच बीकेसी हे कोव्हिड-१९ चे नवीन हॉटस्पॉट ठरत आहे. बीकेसीमध्ये काम करणारे सुमारे ६० जण महिनाभरात पॉझिटिव्ह आले आहेत. त्या पार्श्वभूमीवर ज्यांच्यात लक्षणे आढळून येतात आणि जे हाय रिस्क संपर्कात आहेत, त्यांच्यासाठी अँटिजेन टेस्ट करण्यात येणार आहेत. या टेस्टमुळे घरी जाण्यापूर्वी ते पॉझिटिव्ह आहेत की निगेटिव्ह आहेत याबाबतचा रिपोर्ट त्यांना कामाचे ठिकाण सोडण्यापूर्वी कळेल आणि इतरांना कोरोनाचा संसर्ग होण्यापासून बचाव होईल

मुंबई - राजधानी मुंबईत कोरोनाचा प्रसार होत असताना धारावी, वरळी हे हॉटस्पॉट ठरले होते. मात्र आता मुंबईतील कॉर्पोरेट हब असलेले वांद्रे-कुर्ला कॉम्प्लेक्स म्हणजेच बीकेसी हे कोव्हिड-१९ चे नवीन हॉटस्पॉट ठरत आहे. बीकेसीमध्ये काम करणारे सुमारे ६० जण महिनाभरात पॉझिटिव्ह आले आहेत. मुंबईत सध्या ज्या विभागात कोरोनाचा प्रसार होत आहे, त्या डी विभागातील हे कर्मचारी असल्याने पालिकेने त्याकडे आता विशेष लक्ष देण्यास सुरुवात केली आहे.

मुंबईत मार्च पासून कोरोनाचा प्रसार सुरू झाला. या दरम्यान धारावी आणि वरळीमधील झोपडपट्टी विभाग हॉटस्पॉट बनले होते. पालिकेने परिश्रमाने या विभागातील कोरोनाचा प्रसार रोखला आहे. मुंबईत कोरोनाचा प्रसार काही प्रमाणात कमी झाला असताना अंधेरी ते दहिसर, भांडुप मुलुंड तसेच ग्रॅंट रोड आदी भागात कोरोनाचे रुग्ण मोठ्या प्रमाणात आढळून येत आहेत. शहरात लॉकडाऊनमधून शिथिलता दिल्यावर नोकरी व कामासाठी मोठ्या प्रमाणात नागरिक घराबाहेर पडले आहेत. यादरम्यान एकमेकांच्या संपर्कात आल्याने कोरोनाचा प्रसार होऊ लागला आहे.

असाच कोरोनाचा प्रसार बांद्रा कुर्ला कॉम्प्लेक्स येथे होऊ लागला आहे. याठिकाणी अनेक सरकारी, खासगी कार्यालये आहेत. हिरे व्यापारही येथून केला जातो. याठिकाणी असलेल्या काचेच्या इमारती, दिवसभर एसी सुरू असणे, जेवताना एकत्र जेवणे यामुळे कोरोना विषाणूचा प्रसार होत असल्याची शक्यता आरोग्य विभागातील एका अधिकाऱ्याने वर्तवली आहे. या विभागात काम करणाऱ्या 600 कर्मचाऱ्यांची पालिकेने तपासणी केली असता त्यामधून 60 कोरोना पॉझिटिव्ह असल्याचे आढळून आले आहेत. ज्यांच्यात लक्षणे आढळून येतात आणि जे हाय रिस्क संपर्कात आहेत, त्यांच्यासाठी अँटिजेन टेस्ट करण्यात येणार आहेत. या टेस्टमुळे घरी जाण्यापूर्वी ते पॉझिटिव्ह आहेत की निगेटिव्ह आहेत, याबाबतचा रिपोर्ट त्यांना कामाचे ठिकाण सोडण्यापूर्वी कळेल आणि इतरांना कोरोनाचा संसर्ग होण्यापासून बचाव होईल, असे पालिकेच्या 'डी' विभागातील अधिकाऱ्याने सांगितले.'डी' विभागात राहणारे कर्मचारी पॉझिटिव्ह -पाॅझिटिव्ह कामगारांपैकी बहुतेक जण हे सध्या मोठ्या प्रमाणात कोरोनाचा प्रसार होणाऱ्या डी विभागातील मलबार हिल, नेपियनसी रोड, ताडदेव या भागात राहणारे आहेत. या परिसरात गेल्या तीन दिवसात दररोज १०० च्या आसपास कोरोनाबाधित रुग्ण सापडत आहेत. मागील आठवड्यात नेपियनसी रोडमध्ये हाय-एन्ड या निवासी इमारतीत दोन दिवसात २० रुग्ण आढळल्याने महापालिकेने इमारतीच्या दोन विंग सील केल्या होत्या. तेव्हापासून डी विभागातील राहणाऱ्या रहिवाशांचे स्क्रिनिंग करत आहे.