मुंबई - देशभरात ११ एप्रिलला लोकसभा निवडणुकीच्या मतदानाचा पहिला टप्पा पार पाडत आहे. या टप्प्यात राज्यातही ७ जागांसाठी मतदान होईल. या निवडणुकीच्या प्रचारासाठी भाजपने जय्यत तयारी केली आहे. राज्यात भाजपच्या राष्ट्रीय नेत्यांसह तब्बल एक हजार सभांचे आयोजन करण्यात आले आहे. यापैकी नरेंद्र मोदी यांच्या ८ सभा आयोजित करण्यात आल्या आहेत. मोदींची पहिली सभा १ एप्रिलला वर्ध्यात होईल. तसेच इतर सभांचे वेळापत्रकही लवकरच सांगण्यात येईल, असे भाजप प्रवक्ते केशव उपाध्ये यांनी पत्रकारांशी बोलताना सांगितले.
या शिवाय, एखाद्या मतदारसंघात ताकत लावली तर ती जागा जिंकून येऊ शकते, असे आढळून आल्यास, त्या ठिकाणी कशी रणनीती आखता येईल, याकडेदेखील अमित शाह यांचे लक्ष असणार आहे, असेही उपाध्ये म्हणाले.
यामध्ये सर्वच सभांचा समावेश असून, या सभांसाठी राज्यातील तसेच केंद्रातील नेतेदेखील हजेरी लावणार आहेत. परराष्ट्रमंत्री सुषमा स्वराज, भाजप अध्यक्ष अमित शाह, गृहमंत्री राजनाथ सिंह आणि उत्तर प्रदेशचे मुख्यमंत्री योगी आदित्यनाथ या वरिष्ठ नेत्यांचा समावेश आहे. तसेच राज्यातील ज्येष्ठ नेते एकनाथ खडसे, गिरीश महाजन, विनोद तावडे, चंद्रकांत पाटील आणि सुधीर मुनगंटीवार यांच्या सभा होणार आहेत.
मुख्यमंत्री घेणार ७५ हून अधिक सभा
एकीकडे केंद्रातील नेत्यांच्या सभांचा बार उडत असतानाच राज्याचे मुख्यमंत्री देवेंद्र फडणवीस राज्यात ७५ हून अधिक सभा घेणार आहेत. भाजपच्या २५ उमेदवारांसाठी प्रत्येकी दोन मिळून ५० तर शिवसेना उमेदवारासाठी प्रत्येकी एक सभा आशा २३ सभा मुख्यमंत्री घेणार आहेत.