Sanjay Raut : मुख्यमंत्र्यांवरील आरोपांवरून लक्ष विचलित करण्यासाठी आदित्य ठाकरे यांच्यावर खोटे आरोप - संजय राऊत

महाराष्ट्राच्या मुख्यमंत्र्यांनी नागपूर एनआयटी मध्ये केलेल्या घोटाळ्यावरून लक्ष विचलित करण्यासाठी जाणून बुजून दिशा सालीयन मृत्यू प्रकरण (disha salian case) पुढे आणले जात असल्याची टीका संजय राऊत (Sanjay Raut) यांनी केली आहे. (False allegations against Aditya Thackeray). भाजपने या प्रकरणावरून आदित्य ठाकरे (Aditya Thackeray) यांच्यावर आरोप केले आहेत.

मुंबई : एनआयटी भूखंडावरून मुख्यमंत्री एकनाथ शिंदे यांच्यावर आरोप झालेले असताना आता दिशा सालीयन मृत्यू प्रकरणावरून (disha salian case) युवा सेना अध्यक्ष आदित्य ठाकरे (Aditya Thackeray) यांच्यावर आरोप केले गेले आहेत. या प्रकरणावरून आज विधानसभेत मोठा हंगामा झाला. यावर बोलताना संजय राऊत (Sanjay Raut) यांनी सरकारवर निशाणा साधला आहे. (False allegations against Aditya Thackeray).

राहुल शेवाळे यांना बोलण्याचा अधिकार आहे का? :खासदार संजय राऊत म्हणाले की, अचानक हा विषय रंगवण्यात आला आहे. यात काही चौकशीची मागणी झाली आहे. एसआयटी गठीत करण्यात आली आहे. सुशांत सिंह राजपूत प्रकरणाची संबंध जोडला गेला आहे, पण प्रश्न इतकाच आहे की खासदार राहुल शेवाळे यांना हे बोलण्याचा अधिकार आहे का? ते कालपर्यंत शिवसेनेत होते. सुशांत सिंह राजपूत प्रकरणाची चौकशी पूर्ण झाली आहे. सीबीआयने स्वतः त्याबाबत क्लोजर रिपोर्ट दिला आहे व ती आत्महत्या असल्याचे स्पष्ट केलं आहे. उद्धव ठाकरे व आदित्य ठाकरे यांना बदनाम करण्याचा प्रयत्न केला जात आहे. सुशांत सिंह राजपूत आत्महत्या प्रकरणाचा तपास महाराष्ट्र पोलिसांबरोबर, बिहार पोलिसांनी सुद्धा केला. भाजप ज्या पद्धतीने सांगेल त्या पद्धतीने तपास झालेला आहे. तरीसुद्धा हा पूर्ण तपास झाल्यानंतर सिद्ध झालं की ती आत्महत्या होती. त्यासोबत इतरही विषय जोडले गेले. तरीसुद्धा काल हा विषय महाराष्ट्राच्या विधानसभेपर्यंत नेण्यात आला. याला कारण दोन दिवसांपासून महाराष्ट्राच्या मुख्यमंत्र्यांनी नागपूर एनआयटी मध्ये केलेला घोटाळा व त्यामुळे त्यांच्यावर लटकत असलेली टांगती तलवार, त्यावरून लक्ष विचलित करण्यासाठी जाणून बुजून हा विषय काढण्यात आल्याचं संजय राऊत यांनी सांगितलं आहे.

किरीट सोमय्या कुठे आहेत? :नागपूर मध्ये एनआयटी घोटाळा झाला तेव्हा एकनाथ शिंदे हे सरकारमध्ये नगरविकास मंत्री होते. भ्रष्टाचाराचे हे प्रकरण आपल्या अंगावर येऊ शकते हे लक्षात आल्याने त्यावरून लक्ष विचलित करण्यासाठी आदित्य ठाकरे यांना बदनाम करण्याचा प्रयत्न सुरू असल्याचा आरोपही संजय राऊत यांनी केला आहे. आमच्या भ्रष्टाचारावर बोलणारे किरीट सोमय्या कुठे आहेत? आता त्यांनी मुख्यमंत्र्यांना जाब विचारावा असा टोलाही संजय राऊत यांनी लगावला आहे. प्रताप सरनाईक यांची ईडी चौकशी सुरू होती, अचानक फाईल बंद का झाली? तुमच्या घरातल्या फायली उघडायला लावू का?, असा सवाल राऊत यांनी केला आहे.

महाराष्ट्राच्या प्रतिमेला लाजवणारे काम : संजय राऊत पुढे म्हणाले, "कितीही चौकशी करा, काही होणार नाही. एसआयटी स्थापन करा किंवा प्रकरण इंटरपोलकडे जाऊ द्या, त्याने काही निष्पन्न होणार नाही. या प्रकरणात दिशा सालीयन यांच्या पालकांचे स्टेटमेंट समजून घ्या. तुम्ही एखाद्या व्यक्तीचे खाजगी आयुष्य चव्हाट्यावर आणू शकत नाही. त्यांच्या आईने हात जोडून सांगितले आहे की माझ्या मुलीच्या अब्रूचे व आमच्या परिवाराचे धिंडवडे काढू नका. तरी मुद्दाम म्हणून हे प्रकरण वारंवार बाहेर काढले जाते. हे महाराष्ट्राच्या प्रतिमेला लाजवणारे काम आहे".