सरकार बनवायचे आहे, तयार राहा; बाळासाहेब थोरातांच्या काँग्रेस आमदारांना सूचना

विधान भवन येथे शुक्रवारी काँग्रेसच्या विधिमंडळ नेत्याच्या निवडी संदर्भात आमदारांची मुख्य बैठक झाली. या बैठकीत काँग्रेसचे प्रदेशाध्यक्ष बाळासाहेब थोरात यांनी आपल्या आमदारांना राज्यात आपण लवकरच शिवसेना आणि राष्ट्रवादी काँग्रेससोबत मिळून सरकार स्थापन करणार असल्याची माहिती दिली.

मुंबई -आपले शिवसेनेसोबतच सरकार बनवण्याचे ठरले आहे. जो अंतिम निर्णय होईल तो लवकरच कळवला जाईल. त्यासाठी सर्व आमदारांनी तयार राहावे, अशा सूचना काँग्रेसचे प्रदेशाध्यक्ष बाळासाहेब थोरात यांनी काँग्रेसच्या आमदारांना दिल्या आहेत. विधान भवन येथे शुक्रवारी काँग्रेसच्या विधिमंडळ नेत्याच्या निवडी संदर्भात आमदारांची मुख्य बैठक झाली. या बैठकीत थोरात यांनी आपल्या आमदारांना राज्यात आपण शिवसेना आणि राष्ट्रवादी काँग्रेससोबत मिळून सरकार स्थापन करणार असल्याची माहिती दिली.

राज्यपालांना देण्यात येणाऱ्या निवेदनासाठी आमदारांच्या सह्यांची गरज पडेल, ही बाब लक्षात घेऊन काँग्रेसने सर्व आमदारांच्या सह्यांचे निवेदन तयार केले असल्याची माहिती काँग्रेसच्या एका आमदारांनी दिली. या बैठकीत आम्ही आमदारांच्या सह्या या केवळ उपस्थिती मोजण्यासाठी घेतल्या असल्याचा दावा थोरातांनी माध्यमांशी बोलताना केला.

हेही वाचा - पुणे महापालिकेच्या महापौरपदी मुरलीधर मोहोळ यांची बहुमताने निवड

काँग्रेसचे सर्व कार्याध्यक्ष, माजी मुख्यमंत्री पृथ्वीराज चव्हाण, माजी प्रदेशाध्यक्ष माणिकराव ठाकरे, माजी मुख्यमंत्री अशोक चव्हाण आणि सर्व प्रमुख नेते या बैठकीला उपस्थित होते.

आमदारांची ही बैठक विधिमंडळ नेता निवडीबाबत होती मात्र, विधिमंडळ नेता निवडीचे सर्व अधिकार हायकमांडला देण्याचा निर्णय एकमताने घेण्यात आला. त्यामुळे हायकमांडकडून विधिमंडळ नेता निवडीचा निर्णय येत्या दोन दिवसात येईल.