मुंबई Balasaheb Thackeray Death Anniversary : बाळासाहेब ठाकरे म्हणजे मराठी माणसाच्या न्याय्य हक्कासाठी आयुष्यभर लढणारं व्यक्तिमत्व! मराठी माणसांना न्याय मिळावा यासाठी त्यांनी अनेक मुद्द्यांना वाचा फोडली. आपल्या वादग्रस्त वक्तव्यामुळं नेहमी ते चर्चेत रहायचे. मात्र, त्यांनी कधीही कोणाचीही पर्वा न करता आपली मतं प्रत्येक मुद्द्यावर नेहमीच परखडपणे मांडली. बाळासाहेब ठाकरे म्हणजे मराठी माणसाचा बुलंद आवाज अशी ओळख होती. मराठी माणसाच्या न्याय हक्कासाठी त्यांनी कसलीही पर्वा न करता आपली परखड मतं मांडली. महाराष्ट्रातच मराठी माणसाची होणारी गळचेपी, कर्नाटक महाराष्ट्र सीमावाद असो, बाबरी मशिदीचा मुद्दा असो, किंवा थेट पाकिस्तानबाबतची भूमिका असो, बाळासाहेबांची तोफ धडधडत राहिली. त्यामुळं ते नेहमीच मराठी माणसासहित तमाम देशातील नागरिकांच्या गळ्यातलं ताईत बनून राहिले. आपल्या व्यंगचित्राच्या माध्यमातून त्यांनी राजकीय वादळं उभी केली. आज त्याच बाळासाहेबांच्या पुण्यतिथी निमित्तानं त्यांचा जीवन प्रवास थोडक्यात जाणून घेऊया.
घरातूनच मिळाले बाळकडू : बाळासाहेब ठाकरे यांचा जन्म 23 जानेवारी 1926 साली झाला. बाळासाहेब ठाकरे यांचे वडील केशव सीताराम ठाकरे हे सामाजिक कार्यकर्ते तसंच एक पत्रकारदेखील होते. त्यांना प्रबोधनकार ठाकरे म्हणूनही ओळखलं जातं. एकूण नऊ भावंडांपैकी बाळासाहेब ठाकरे हे सर्वात मोठे होते. प्रबोधनकार ठाकरे हे संयुक्त महाराष्ट्र लढ्यातील अग्रस्थानी होते. त्यामुळं मराठी माणसाच्या हक्कासाठी लढण्याचं बाळकडू त्यांना घरातूनच मिळाले.
मार्मिक हे साप्ताहिक सुरु : पत्रकार म्हणून आपल्या कारकिर्दीची सुरुवात बाळासाहेब ठाकरे यांनी 'फ्री प्रेस जनरल' या इंग्रजी वृत्तपत्रातून केली. या वृत्तपत्रात व्यंगचित्रकार म्हणून त्यांनी पहिल्यांदा नोकरी मिळवली. यासोबतच इंग्रजी वृत्तपत्रातदेखील त्यांनी काढलेले व्यंगचित्र प्रसिद्ध झाले. 13 जून 1948 ला बाळासाहेब ठाकरे यांचं लग्न मीनाताई ठाकरे यांच्याशी झालं. नोकरीमध्ये त्यांना रस वाटत नव्हता म्हणून 1960 साली त्यांनी आपलं स्वतःचं मार्मिक हे साप्ताहिक सुरू केलं. मार्मिकच्या माध्यमातून महाराष्ट्रातील आणि मराठी माणसाचे प्रश्न त्यांनी समोर आणण्यास सुरुवात केली.