मुंबई:- रामदेव बाबा यांच्या पतंजली रिसर्च इन्स्टिट्यूटकडून तयार करण्यात आलेल्या 'कोरोनील' औषधाला केंद्राकडून परवानगी देण्यात आली आहे. आता हे औषध कोरोनावरील उपचारासाठी वापरले जाणार आहे. पण त्याआधीच हे औषध वादात अडकले आहे. कुठल्या संशोधनाच्या आधारावर या औषधाला परवानगी दिली? असा सवाल करत आता इंडियन मेडिकल असोसिएशन (आयएमए) ने ही परवानगी मागे घेत औषध ही मागे घ्यावे अशी मागणी केंद्राकडे एका पत्राद्वारे केली आहे. रामदेव बाबा, पतंजली आणि केंद जनतेची दिशाभूल करत आहे. ही दिशाभूल त्वरित थांबली नाही तर कायदेशीर लढाई लढू असा इशारा ही आयएमएकडून देण्यात आल्याची माहिती डॉ जयेश लेले, राष्ट्रीय सचिव, आयएमए यांनी 'ईटीव्ही भारत'शी बोलताना दिला आहे.
रामदेव बाबाचे 'कोरोनील' औषध वादात १५४ देशात कोरोनिलचे वितरणरामदेव बाबा आणि त्यांच्या पतंजलीकडुन कोरोनावरील औषध तयार करण्यात येत असल्याचे समजल्यापासून त्यावर वाद सुरू आहे. पण आता हा वाद खऱ्या अर्थाने पेटणार आहे. कारण आता त्यांच्या कोरोनील या आयुर्वेदिक औषधाला केंद्र सरकारच्या आरोग्य विभागासह डीसीजीआयने परवानगी दिली आहे. तर या औषधाचे लाँचिंग नुकतेच एका भव्य सोहळ्यात करण्यात आले आहे. यावेळी केंद्रीय आरोग्य मंत्री डॉ हर्षवर्धन आणि केंद्रीय दळणवळण मंत्री नितीन गडकरी हे ही उपस्थित होते. कोरोनिल हे औषध कोरोनावर गुणकारी असल्याचा दावा यावेळी पतंजलीकडून करण्यात आला. तर जागतिक आरोग्य संघटनेकडून ही याला परवानगी मिळाल्याचा दावा पतंजलीकडून करण्यात आला आहे. महत्वाचे म्हणजे या औषधाचे वितरण भारतासह १५४ देशांमध्ये केले जाणार असल्याचेही यावेळी जाहीर करण्यात आले आहे.
जागतिक संघटनेकडून परवानगी नाही?कोरोनीलला जागतिक आरोग्य संघटनेची परवानगी असल्याचा पतंजलीचा दावा अखेर खोटा निघाला आहे. जागतिक आरोग्य संघटनेने ट्विट करत आपल्याकडून आतापर्यंत कोविड 19 वरील कोणत्याही पारंपरिक औषधाला परवानगी देण्यात आली नसल्याचे स्पष्ट करण्यात आले आहे. यावरून पतंजली आणि रामदेव बाबाचे पितळ उघड झाल्याचे आयएमएचे म्हणणे आहे. जागतिक आरोग्य संघटनेने परवानगी दिली नसल्याचे स्पष्ट झाल्याने आता कोरोनीलची परवानगी केंद्राने मागे घ्यावी. आमचा आयुर्वेदाला, आयुर्वेदिक औषधाना कुठेही विरोध नाही. पण कोरोनील औषधाच्या संशोधनाची कोणतेही पुरावे पतंजली वा केंद्राकडून दाखवले जात नाहीत. सगळे जग कोरोनावरील औषध तयार करण्यासाठी प्रयत्न करत आहे. पण त्यांना यश आलेले नाही. अशावेळी पतंजलीने कसे हे औषध तयार केले हा प्रश्न आहे. एकूणच पतंजली, रामदेव बाबा आणि केंद्र दिशाभूल करत आहे. त्यामुळे हे औषध त्वरित मागे घ्यावे असे ही डॉ लेले यांनी स्पष्ट केले आहे. तर सरकारने ही मागणी मान्य केली नाही आणि या औषधाचे वितरण सुरू झाले तर आम्ही याविरोधात न्यायालयात धाव घेऊ असा इशारा ही त्यांनी दिला आहे. त्यामुळे आता हा वाद पेटण्याची शक्यता आहे.
२०० हुन अधिक रिसर्च पेपरकोरोनीलसाठीच्या संशोधनाचे पेपर कुठे आहेत असा सवालही आयएमएकडून केला जात आहे. आपल्याकडे या औषधावरील २०० हुन अधिक रिसर्च पेपर तर कोरोनावरील २५ रिसर्च पेपर असल्याचा दावा पतंजलीने केला आहे. हे पेपर असतील आणि ते योग्य असतील तर ते जाहीर करावेत असे आवाहनही डॉ लेले यांनी केले आहे. दरम्यान आयएमएने यानिमित्ताने डॉ हर्षवर्धन यांना ही लक्ष्य केले आहे. डॉ हर्षवर्धन हे एमबीबीएस डॉक्टर आहेत. अशात कोरोना आजाराचे गांभीर्य त्यांना माहित आहे. तेव्हा अशा प्रकारे कुणीही कोरोनावरील औषध आणून ते विकू शकते का असा सवाल आयएमएने डॉ हर्षवर्धन यांना केला आहे. तर या औषधाची परवानगी रद्द करण्यासाठी लिहलेल्या पत्रात डॉ हर्षवर्धन यांच्यावर अनेक प्रश्नांचा भडिमार केला आहे.
