राज्याच्या मुख्य सचिवपदी अजोय मेहता, तर मुंबईच्या आयुक्तपदी प्रवीण परदेशी

गेल्या अनेक दिवसापासून राज्यातील प्रशासनात मोठे फेरबदल होणार असल्याची जोरदार चर्चा होती. शुक्रवारी अखेर मदान यांच्या स्वेच्छा निवृत्ती नंतर दोन मोठ्या नियुक्त्या करण्यात आल्या आहेत.

मुंबई- राज्याच्या मुख्य सचिवपदी असलेले युपीएस मदान यांनी आज अचानक स्वेच्छा निवृत्ती घेतल्याने मुख्य सचिव पद रिक्त झाले होते. या पदावर मुंबई महापालिका आयुक्त अजोय मेहता यांची नियुक्ती करण्यात आली आहे. तर मुंबई महापालिकेच्या आयुक्तपदी मुख्यमंत्र्यांचे अप्पर मुख्य सचिव प्रवीण परदेशी यांची वर्णी लागली आहे. प्रवीण परदेशी हे गेल्या साडेचार वर्षांपासून मुख्यमंत्री कार्यालयात कार्यरत असल्याने मुख्यमंत्र्यांच्या खास मर्जीतील अधिकारी म्हणून ते प्रशासकीय वर्तुळात परिचित आहेत. लवकरच हे अधिकारी पदाची सूत्र स्वीकारणार आहेत.

मावळते मुख्य सचिव मदान यांनी स्वेच्छा निवृत्तीचा अर्ज दाखल केल्यानंतर मुख्यमंत्री देवेंद्र फडणवीस यांनी तो तात्काळ मंजूर केला. करार पद्धतीने मुख्यमंत्र्यांच्या विशेष सल्लागार पदी मदान यांची नियुक्ती करण्यात आली असून या संदर्भात सामान्य प्रशासन विभागाने शासन आदेश निर्गमित केले आहेत. त्याच बरोबर पुढील आठवड्यात सिकॉमच्या अध्यक्षपदी युपीएस मदान यांची नियुक्ती करण्यासही मुख्यमंत्र्यांनी मान्यता दिली आहे.

युपीएस मदान

गेल्या अनेक दिवसापासून राज्यातील प्रशासनात मोठे फेरबदल होणार असल्याची जोरदार चर्चा होती. शुक्रवारी अखेर मदान यांच्या स्वेच्छा निवृत्तीनंतर दोन मोठ्या नियुक्त्या करण्यात आल्या. मावळते मुख्य सचिव युपीएस मदान हे ३१ सप्टेंबर रोजी निवृत्त होणार होते. मदान यांनी महाराष्ट्र लोकसेवा आयोगावर जाण्यास नकार दिल्याने ऐनवेळी मुख्यमंत्र्यांची पंचाईत झाली होती.

मदान यांना मुख्यमंत्री कार्यालयात विशेष सल्लागार म्हणून कुठल्या आधारावर नियुक्त करायचे? याबाबत सामान्य प्रशासन विभागाने त्रुटी काढली होती. यावर दिवसभर मुख्यमंत्र्यांच्या निवास्थानी खलबते झाल्यावर मदान यांनी सेवानिवृत्ती घेतली. त्यांनतर त्यांना सामान्य प्रशासन विभागाच्या निर्णयानुसार प्रथम एक वर्षाच्या अथवा मुख्यमंत्र्यांचे पुढील आदेश होईपर्यंत विशेष सल्लागार म्हणून नियुक्ती आदेश निर्गमित करण्यात आले. मदान हे राज्यात सर्वात कमी केवळ चाळीस दिवस मुख्य सचिव पदावर राहिलेले अधिकारी ठरले आहेत.