मुंबई - अभिनेता अमिताभ बच्चन व अभिषेक बच्चन यांना मुंबईतील नानावटी रुग्णालयात दाखल करण्यात आले आहे. त्यांना कोरोनाची लागण झाली असून त्यांच्या कुटुंबियांची व कर्मचाऱ्यांचीही कोरोना चाचणी घेण्यात आली आहे. याबाबत खुद्द बच्चन पिता-पुत्रांनी यांनी त्यांच्या अधिकृत ट्विटर खात्यावरुन माहिती दिली.
अमिताभ बच्चन यांचा कोरोना अहवाल पॉझिटिव्ह आल्यानंतर त्यांनी त्यांच्या कुटुंबियांची व घरात काम करणाऱ्या कर्मचाऱ्यांची चाचणी येणे बाकी असल्याचे ट्विटकरुन सांगितले होते. त्यानंतर तासाभरातच अभिषेक बच्चन यांचाही कोरोना अहवाल पॉझिटिव्ह आला आहे, अशी माहिती स्वतः अभिषेक बच्चन यांनी त्यांच्या अधिकृत ट्विटर खात्यावरून दिली आहे.
माझ्याशी गेल्या 10 दिवसात कामानिमित्त संपर्कात आलेल्या प्रत्येकाने आपली कोरोना चाचणी करून घ्यावी, असे आवाहन अमिताभ बच्चन यांनी केले असून लोकांनी घाबरुन जाऊ नये, शांत रहावे, असे आवाहन अभिषेक बच्चन यांनी केले आहे. त्यांना कोरोनाची सौम्य लक्षणे दिसू लागल्यानंतर त्यांनी परिवार व घरात काम करणाऱ्या कर्मचाऱ्यांसह कोरोनाची चाचणी करुन घेतली होती.
अमिताभ व अभिषेक बच्चन यांच्यावर सध्या नानावटी रुग्णालयात उपचार सुरू असून जया, ऐश्वर्या व आराध्या यांच्यासह कर्मचाऱ्यांच्या कोरोना चाचणीचे अहवाल येणे बाकी आहे.