मुंबई :ठाकरे गटाचे नेते आदित्य ठाकरे एकनाथ शिंदे यांच्या बंडखोरीवर भाष्य करताना म्हणाले की, हे चाळीस लोक स्वत:च्या जागांसाठी आणि पैशांसाठी भाजपाबरोबर गेले आहेत. तिकडे जाण्याचे दुसरे कोणतेही कारण नव्हते. केंद्रीय तपास यंत्रणा अटक करतील, म्हणून मुख्यमंत्री एकनाथ शिंदे उद्धव ठाकरे यांच्या निवासस्थानी ‘मातोश्री’वर आले होते. तेथे रडले होते. भाजपाबरोबर गेलो नाहीतर मला अटक होईल, असे त्यांनी त्यावेळी सांगितले होते, असा गौप्यस्फोट आदित्य ठाकरेंनी केला आहे.
महाविकास आघाडीत मोठी खळबळ :महाराष्ट्राच्या राजकीय वर्तुळात आदित्य ठाकरे यांच्या या विधानानतर खळबळ उडाली आहे. बंडखोरीबाबतचा आरोप-प्रत्यारोपाचा वाद पुन्हा आता आणखी वाढण्याची शक्यता दिसत आहे. अंजली दमानिया यांनी १२ एप्रिलला अजित पवार लवकर भाजपाबरोबर जातील, तसेच शिंदे गटाचे १५ आमदार अपात्र ठरतील, असा दावा केला आहे. त्यामुळे महाविकास आघाडीत मोठी खळबळ उडाली आहे. अनेक राजकीय नेत्यांनी दमानिया यांच्या या दाव्यावर प्रतिक्रिया दिल्या आहेत. हे प्रकरण ताजे असताना आदित्य ठाकरे यांनी शिंदेंच्या बंडखोरीवर मोठे विधान केल्याचे समोर आले आहे.