लातूर - पाणी टंचाई ही लातूरकारांच्या पाचवीलाच पुजलेली.. पण यंदा टंचाईच्या झळा कमी प्रमाणात आहेत. मे महिन्याच्या अखेरीस जिल्ह्यात केवळ दोन टँकर सुरू आहेत. तर लातूर शहराला पाणी पुरवठा करणाऱ्या मांजरा धरणात 22 दलघमी पाणीसाठा असून ऑगस्टपर्यंत पाणी पुरेल असा अंदाज व्यक्त केला जात आहे.
शहराला 10 दिवसातून एकदा पाणीपुरवठा, जिल्ह्यात 2 टँकर अन् 365 अधिग्रहणाचे प्रस्ताव
जिल्ह्यातील ग्रामीण भागात पाणी प्रश्न निर्माण झाला आहे. त्यामुळेच 239 गावातून 365 अधिग्रहणाचे प्रस्ताव जिल्हा प्रशासनाकडे दाखल झाले आहेत. मात्र, टंचाईची पाहणी करूनच जिल्हा प्रशासन अधिग्रहणाचे तसेच टँकर सुरू करण्याची परवानगी देत आहे. सद्यस्थितीला देवणी तालुक्यातील सय्यदपूर आणि चवन हिप्परगा येथेच टँकर सुरू आहेत. शिवाय 239 पैकी केवळ 169 गावात अधिग्रहणाला परवानगी देण्यात आली आहेत.