वृक्षलागवडीचा लातूर पॅटर्न : हिरवगार लातूर बनवण्यासाठी लातूर ग्रीनचा स्तुत्य उपक्रम

वृक्षलागवडीच्या अनेक मोहीम राबवल्या जातात. पण, प्रत्यक्षात त्या कागदावरच राहतात. पण, लातूरमधील एका ग्रुपने लातूर हिरवेगार करण्याचा निर्णय घेतला आहे.

लातूर - वृक्षलागवडीच्या अनेक मोहिमा राबवल्या जातात. पण, प्रत्यक्षात त्या कागदावरच राहतात. पण, लातूरमधील एका ग्रुपने लातूर हिरवेगार करण्याचा निर्णय घेतला आहे. केवळ निर्णयच नाही तर प्रत्यक्षात या मोहिमेला सुरुवात होऊन चार वर्षे उलटली असली तरी अजूनही यामध्ये सातत्य आहे. दुष्काळी जिल्हा म्हणून लातूरची असलेली ओळख पुसून टाकण्याचा निर्धार लातूर ग्रीन केला आहे. एवढेच नव्हे तर गेल्या वर्षभरात या ग्रुपच्या वतीने 40 हजार वृक्षांची लागवड करण्यात आली आहे. निम्मे लातूर शहर झोपेत असताना या ग्रुपच्या सदस्यांचे हात राबत वृक्षलागवडीसाठी असतात.

रेल्वेने पाणीपुरवठा करण्यात आलेले शहर अशी ही लातूरची ओळख काही दिवस का होईना राहिलेली आहे. त्यानंतर अनेक मंत्रिमंडळाच्या बैठका लातुरात पार पडल्या. उजनीचे पाणी लातूरला आणण्यावरून राजकीय वातावरण ढवळूनही निघाले. मात्र, समस्या आजही कायम आहेत. पण, या सर्व गोष्टींचा मुळाशी जाऊन ग्रीन लातूरचा ग्रुप गेल्या 4 ते 5 वर्षांपासून काम करत आहे. शहरातील एक विशिष्ट परिसर ठरवला जातो. त्या ठिकाणी लागवड करण्याचे निश्चित केले जाते आणि दिवसउजडताच या ग्रुपमधील सर्व सदस्य हे एकवटले जातात. वृक्षलागवडीबरोबरच संवर्धनाचे अविरत काम सुरू आहे.

जून 2019 पासून आजपर्यंत एकाही दिवसाचा खंड या ग्रुपने पडू दिलेला नाही. त्यामुळेच या 495 दिवसांमध्ये 39 हजार वृक्षलागवड करण्यात त्यांना यश मिळाले आहे. भविष्यातही हा उपक्रम कायम राहणार आहे. शहराबरोबर जिल्ह्यातही हा उपक्रम राबवला जाणार आहे. सकाळी 6 ते 10 पर्यंत वृक्षलागवड आणि लागवड केलेल्या वृक्षांचे संगोपन अशी दुहेरी बाजू सांभाळत आहेत. शहरातील एक ग्रुप आशा सामाजिक कामात पूर्णपणे झोकून दिले आहेत. एकीकडे शासन स्थरावरील उदासीनता आणि दुसरीकडे लातूर ग्रीनचा उपक्रम हा प्रेरणादायी ठरत आहे. या अनोख्या उपक्रमामुळे लातूर तर हिरवेगार होणारच आहे शिवाय यामुळे जिल्ह्यातील पर्जन्याचे प्रमाणही वाढणार आहे.

एका ग्रुपने सुरू केलेल्या या उपक्रमाला अनेकांची साथ मिळणे गरजेचे आहे. यासाठी लातूरकरांनी केवळ जागा दाखवावी त्या ठिकाणी वृक्ष लागवड करण्याची जबाबदारी ही या ग्रुपची राहणार आहे.

हेही वाचा -लातूरमध्ये नऊ पोती गांजा जप्त; वाढवना पोलिसांची कारवाई