पुणे परिक्षेत्रामध्ये वर्षभरात 117 सापळा कारवाया; अप्पर पोलीस अधीक्षक सुहास नाडगौडा यांची माहिती

पुणे परिक्षेत्राचे दक्षता जनजागृती सप्ताह मोठ्या प्रमाणात राबविला जात आहे. दक्षता जनजागृती सप्ताहबाबत माहिती देण्यासाठी कोल्हापुरात पत्रकार परिषद आयोजित करण्यात आली होती.

कोल्हापूर - पुणे परिक्षेत्रात लाचलुचपत प्रतिबंधक विभागाने वर्षभरात एकूण 117 सापळा रचून कारवाया केल्या असल्याची माहिती पुणे परिक्षेत्राचे अप्पर पोलीस अधीक्षक सुहास नाडगौडा यांनी दिली. दक्षता जनजागृती सप्ताहबाबत माहिती देण्यासाठी कोल्हापूरात आयोजित पत्रकार परिषदेत ते बोलत होते.

ते म्हणाले, पुणे परिक्षेत्राचे दक्षता जनजागृती सप्ताह मोठ्या प्रमाणात राबविला जात आहे. भ्रष्टाचार मुक्त महाराष्ट्र व्हावा आणि सर्वसामान्य जनतेला कोणत्याही पद्धतीने सरकारी कार्यालयातील कामे पूर्ण होण्यामध्ये अडथळा येऊ नये, याबाबत या अभियानाच्या माध्यमातून जनजागृती केली जात आहे. शिवाय जास्तीत जास्त तक्रारदार तक्रारीसाठी समोर यावेत यासाठी सुद्धा जनजागृती केली जात असल्याचेही नाडगौडा यांनी म्हटले आहे.

हेही वाचा -अशोक चव्हाण यांना मराठा आरक्षण उपसमितीवरून हटवा - विनायक मेटे

गेल्या वर्षीच्या तुलनेत 20 टक्के घट -

जानेवारी 2020पासून ऑक्टोबर 2020पर्यंत महाराष्ट्रात 518 कारवाया झाल्या आहेत. पुणे परिक्षेत्रात 117 कारवाया करण्यात आल्या आहेत. गेल्या वर्षीच्या तुलनेत पुणे परिक्षेत्रात 20 टक्के घट झाली आहे. गेल्या वर्षी याच कालावधीमध्ये 147 कारवाया करण्यात आल्या होत्या, अशी माहितीही अप्पर पोलीस अधीक्षक सुहास नाडगौडा यांनी दिली. दरम्यान, यापुढेही नागरिकांनी आपल्या तक्रारी न घाबरता आमच्याकडे द्याव्यात आपले काम पूर्ण होईपर्यंत आम्ही पाठपुरावा करत राहू, असेही त्यांनी म्हटले.