...अन्यथा राजकीय चक्र सुरूच आहे; त्यांना खाली यायला वेळ लागणार नाही

माझ्यावरील आरोप मी सहन करत आहे. त्यामुळे वेळीच काळजी घेऊन पालकमंत्र्यांनी २०१४ ची वेळ येऊ देऊ नये, असा टोला देखील शिवसेनेचे माजी आमदार राजेश क्षीरसागर यांनी पालकमंत्री सतेज पाटील यांना लगावला.

कोल्हापूर- पालकमंत्र्यांनी स्वतःचे काम सुधारावे, झाले गेले विसरून कामाला लागावे अन्यथा राजकीय चक्र सुरूच आहे. त्यांना खाली यायला वेळ लागणार नाही. शिवसेनेवर अन्याय होत असताना देखील मी अद्यापही काही बोललो नाही. माझ्यावरील आरोप मी सहन करत आहे. त्यामुळे वेळीच काळजी घेऊन पालकमंत्र्यांनी २०१४ ची वेळ येऊ देऊ नये, असा टोला देखील शिवसेनेचे माजी आमदार राजेश क्षीरसागर यांनी पालकमंत्री सतेज पाटील यांना लगावला.

कोल्हापूर जिल्ह्याचे पालकमंत्री सतेज पाटील यांनी कोल्हापूर महानगरपालिका निवडणुकीच्या संदर्भात 'फिक्सिंग भाषणा'चा मेळावा घेतला. या फिक्सिंग भाषणात येणाऱ्या महापालिका निवडणुकीत शिवसेना स्वतंत्रपणे लढेल, असे माजी आमदार राजेश क्षीरसागर म्हणाले असल्याचे त्यांनी सांगितले. मी पालकमंत्र्यांना जाहीर आव्हान करतो की, त्यांनी गेली काही वर्तमानपत्रे चाळून घ्यावीत. स्वतंत्रपणे निवडणूक कोण लढवणार म्हणाले? याचा अभ्यास त्यांनी करावा. सर्वात प्रथम राष्ट्रवादीने जाहीर केले की, आम्ही स्वतंत्रपणे लढणार आहोत. त्यानंतर काँग्रेसने आपली भूमिका स्पष्ट केली. मग शिवसेनेसारख्या स्वाभिमानी पक्षामध्ये काय कमी आहे? असे क्षीरसागर म्हणाले. आम्हीदेखील संपूर्ण जागा लढू शकतो, या दृष्टीने मी हे विधान केले. शिवसेना आज शहरांमध्ये कमकूवत आहे. शिवसेनेला उमेदवार द्यावे लागू नयेत, या हेतूने शहरांमध्ये हे शिवसेनेला टेकओव्हर करण्याचे काम पालकमंत्री सतेज पाटील यांच्याकडून सुरू आहे. इतकेच काय तर मित्र पक्ष असलेल्या राष्ट्रवादीच्या काही जागांवर ते टेकओव्हर करण्याच्या नादात पालकमंत्री आहेत, असा आरोप देखील राजेश क्षीरसागर यांनी केला. स्वतःला काँग्रेसच्या जागा जास्त निवडून आणायच्या आहेत. राज्याच्या मुख्य पदाचा वाटा त्यांना घ्यायचा आहे. पण, त्यावेळी शिवसेनेचे मुख्यमंत्री या पालकमंत्र्यांना दिसत नाहीत, असा आरोप देखील राजेश क्षीरसागर यांनी केला. शहरात सेनेला काही द्यायला लागू नये, यासाठी स्वतःचे उमेदवार उभे करायचे हेच तंत्र हा त्यामागचा हेतू आहे.

वरिष्ठांची मर्जी आज आम्ही मानायला तयार

पुढे क्षीरसागर म्हणाले, वरिष्ठांची मर्जी आज आम्ही मानायला तयार आहोत, त्यांनी आम्हाला सांगितले, महाविकास आघाडी करा, तर आम्ही करायला तयार आहोत. 2014 च्या विधानसभा निवडणुकीत पालकमंत्री सतेज पाटील यांचा पराभव झाला. तर 2017 मध्ये विधानपरिषदेच्या निवडणुकीला शिवसेनेच्या नगरसेवकांनी, जिल्हा परिषद सदस्यांनी त्यांना मतदान केले. मात्र, 2019 च्या विधानसभा निवडणुकीमध्ये आम्हाला धोका देण्याचे काम पालकमंत्री सतेज पाटील यांनी केले.

ज्या वेळी शिवसेनेची गरज भासते त्या वेळी त्यांनी नेहमीच शिवसेनेकडून काहीतरी घेतली आहे. विधानपरिषदेची पायरी सतेज पाटलांना चढायची होती. त्यावेळी शिवसेनेचा पाठिंबा त्यांनी घेतला. शिवसेनेचे बोट धरूनच ते विधानभवनात गेले आहेत, याचा त्यांना त्याचा विसर पडला आहे.

त्यांनी धोका देण्याचे काम केले

पुढे क्षीरसागर म्हणाले, राजकीय परिस्थिती आहे तशी राहत नाही. पाटील हे राष्ट्रवादीला देखील टेकओव्हर करण्याचे काम करत आहेत. त्यामुळे राष्ट्रवादीचे नेते देखील सतर्क झाले आहेत. मी बेसावध असताना त्यांनी धोका देण्याचे काम केले. जनता उघड्या डोळ्याने पाहत आहे. शिवसेनेने कोणा-कोणाला मदत केली. पुढच्या काळात पालकमंत्र्यांनी स्वतःचे काम सुधारावे. झाले गेले विसरून कामाला लागावे अन्यथा राजकीय चक्र सुरूच आहे. त्यांना खाली यायला वेळ लागणार नाही, असा टोला देखील क्षीरसागर यांनी लावला. शिवसेनेवर अन्याय होत असताना देखील मी अद्यापही काय बोललो नाही. माझ्यावरील आरोप मी सहन करत आहे. त्यामुळे काहीही बोलले तर चालेल, असे होणार नाही. त्यामुळे वेळीच काळजी घेऊन, २०१४ ची वेळ येऊ देऊ नये, असा टोला देखील क्षीरसागर यांनी पालकमंत्री सतेज पाटील यांना लगावला.