VIDEO : पाहा कशी असते रॅपिड अँटीजेन टेस्ट अन् कसा सापडला कोरोना पॉझिटिव्ह रुग्ण

कोल्हापूर महानगरपालिकेने कोरोनाचा प्रादुर्भाव रोखण्यासाठी चौका-चौकात रॅपिड अँटीजेन टेस्ट मोहिमेला सुरुवात केली आहे. रस्त्यावर विनाकारण फिरणाऱ्यांची टेस्ट सुरू केल्याने पॉझिटिव्ह रुग्ण सापडत आहेत. ईटीव्ही भारतच्या कॅमेऱ्यामधून आपण पाहू शकता या मोहिमेत कोरोना पॉझिटिव्ह रुग्ण कसा सापडला.

कोल्हापूर - कोल्हापूर महानगरपालिकेने कोरोनाचा प्रादुर्भाव रोखण्यासाठी चौका-चौकात रॅपिड अँटीजेन टेस्ट मोहिमेला सुरुवात केली आहे. रस्त्यावर विनाकारण फिरणाऱ्यांची टेस्ट सुरू केल्याने पॉझिटिव्ह रुग्ण सापडत आहेत. ईटीव्ही भारतच्या कॅमेऱ्यामधून आपण पाहू शकता या मोहिमेत कोरोना पॉझिटिव्ह रुग्ण कसा सापडला.

कोल्हापूर शहरातील कोरोनाचा प्रादुर्भाव रोखण्यासाठी महापालिका आयुक्त कादंबरी बलकवडे यांच्या आदेशानुसार शहरातील भाजी मंडई, गर्दीचे ठिकाण आणि चौकाचौकात रॅपिड अँटीजेन टेस्ट करण्यास सुरुवात केली आहे. आतापर्यंत जवळपास ५७० जणांची टेस्ट करण्यात आली आहे. या टेस्टमध्ये आत्तापर्यंत जवळपास 37 जण पॉझिटिव्ह आल्याने खळबळ उडाली आहे.

शहरातील सर्व भाजी मंडईतील फळ, भाजी विक्रेते यांची रॅपिड अँटीजेन टेस्ट करण्यात आली. या टेस्टमध्ये आत्तापर्यंत 20 विक्रेते पॉझिटिव्ह आढळले आहेत. सुपर स्पेडर म्हणून ज्यांचा उल्लेख केला जातो. त्या भाजी विक्रेत्यांपैकी २० भाजीविक्रेते कोरोनाबाधित आढळून आल्याने कोल्हापूर महानगरपालिकेने याची धास्ती घेतली आहे.

शांतीनगर, पाचगाव बनतेय हॉटस्पॉट -

शहरातील विविध चौकात ही मोहीम होत आहे. मात्र आत्तापर्यंत शांतीनगर पाचगाव या भागातील नागरिक कोरोना पॉझिटिव्ह असल्याचे आढळून आले आहेत. त्यामुळे महापालिकेच्या आरोग्य विभागाने शांतीनगर आणि पाचगाव हॉटस्पॉट केंद्र बनत असल्याचे सांगितले आहे.