तेरवाड बंधाऱ्यावर लाखो मृत माशांचा खच; प्रदूषण नियंत्रण मंडळाच्या अधिकाऱ्यांना ग्रामस्थांनी ठेवलं बांधून

कोल्हापूरची जीवनदायिनी असलेली पंचगंगा नदी प्रदूषणाच्या विळख्यात आहे. इचलकरंजी शहरानजीक असलेल्या तेरवाड बंधाऱ्यावर आज लाखो मृत माशांचा अक्षरशः खच लागलेला पाहायला मिळाला. नदीचे पाणीही काळे झाले आहे. यामुळे नदी किती मोठ्या प्रमाणात प्रदूषित झाली आहे, हे समोर आले आहे.

कोल्हापूर -कोल्हापूरची जीवनदायिनी असलेली पंचगंगा नदी प्रदूषणाच्या विळख्यात आहे. मात्र या गंभीर गोष्टीकडे लक्ष न दिल्यामुळे प्रदूषण नियंत्रण मंडळाच्या अधिकाऱ्यांनाच नागरिकांनी बांधून ठेवले आहे. इचलकरंजी येथील तेरवाड बंधाऱ्यावर अधिकाऱ्याला येथील स्थानिक ग्रामस्थांनी बांधून ठेवलं असून पंचगंगा नदी दूषित करणाऱ्यांवर कारवाई केली नसल्याने हे ग्रामस्थ आक्रमक झाले आहेत. इचलकरंजी शहरानजीक असलेल्या तेरवाड बंधाऱ्यावर आज लाखो मृत माशांचा अक्षरशः खच लागलेला पाहायला मिळाला. त्यानंतर नदी किती मोठ्या प्रमाणात प्रदूषित झाली आहे, हे समोर आले आहे. त्यामुळेच स्थानिक नागरिक आक्रमक झाले असून नदी दूषित करणाऱ्या संबंधितांवर कारवाई करावी, अशी त्यांनी मागणी केली आहे.

तेरवाड बंधाऱ्यावर लाखो मृत माशांचा खच; नदीतील पाणी सुद्धा काळे -अनेक कारखान्यांचे दूषित पाणी, एमआयडीसीमधील प्रक्रिया झालेले पाणी थेट पंचगंगा नदीमध्ये मिसळत आहे. त्यामुळे दिवसेंदिवस नदीचे पाणी दूषित होत असून सद्या नदी काळवंडून गेली असल्याचे चित्र पाहायला मिळत आहे. गेल्या काही दिवसांपासून येथील तेरवाड बंधाऱ्यावर हजारो मृत मासे तरंगताना पाहायला मिळत आहेत. आजतर अक्षरशः लाखो माशांचा खच नदीच्या काठाला दिसत असून याकडे प्रदूषण नियंत्रण मंडळाने पूर्णपणे दुर्लक्ष केल्याचा आरोप येथील स्थानिकांनी केला आहे.

प्रदूषण नियंत्रण मंडळाच्या अधिकाऱ्यांना ग्रामस्थांनी ठेवलं बांधून

वारंवार प्रदूषण नियंत्रण मंडळाला सांगून याकडे दुर्लक्ष -गेल्या अनेक वर्षांपासून येथील पंचगंगा नदी प्रदूषणाचा प्रश्न कायम आहे. येथील स्थानिक नागरिकांनी वारंवार प्रदूषण नियंत्रण मंडळाला कळवले आहे. मात्र प्रशासनानाकडून आजपर्यंत कोणतीही कारवाई झाली नाहीये. लॉकडाऊन असताना सर्वकाही उद्योग बंद होते. तेव्हा नदी इतकी स्वच्छ झाली होती की नदीचा तळ सुद्धा स्पष्टपणे दिसत होता. मात्र आता नदीमधील पाणी काळे दिसू लागले असल्याचे स्थानिक नागरिकांनी म्हटले आहे. आणि म्हणूनच संतप्त नागरिकांनी आज प्रदूषण नियंत्रण मंडळाच्या अधिकाऱ्याला तेरवाड येथील बंधाऱ्यावर दोराने बांधून घातले शिवाय संबंधितांवर कारवाई करावी अशी मागणी केली.