कोल्हापूरचा हुतात्मा जवान संग्राम पाटीलवर सोमवारी अंत्यसंस्कार, ग्रामस्थांकडून तयारी सुरू

जम्मू-काश्मीरच्या राजौरी सेक्टरमध्ये पाकिस्तानच्या भ्याड हल्ल्यात महाराष्ट्राने आज आणखी एक सुपुत्र गमावला. कोल्हापूर जिल्ह्यातील निगवे खालसा येथील संग्राम शिवाजी पाटील यांना वीरमरण आलं आहे. त्यांच्यावर सोमवारी गावातील विद्यालयाच्या पटांगणावर अंत्यसंस्कार होणार आहेत. ग्रामस्थांकडून अंत्यसंस्काराची तयारी सुरू करण्यात आली आहे.

कोल्हापूर -पाकिस्तानच्या भ्याड हल्ल्यात कोल्हापूर जिल्ह्यातील आणखीन एक जवान हुतात्मा झाला. करवीर तालुक्यातील निगवे खालसा येथील 33 वर्षीय संग्राम पाटील हा जवान सीमेवर लढताना हुतात्मा झाला. ही बातमी कळताच आमदार ऋतुराज पाटील यांनी निगवे खालसा या गावाला भेट देत अंत्यसंस्कार करण्याच्या ठिकाणाची पाहणी केली. कोरोनाच्या पार्श्‍वभूमीवर योग्य खबरदारी घेण्याचे आवाहन यावेळी त्यांनी ग्रामस्थांना केले. सोमवारी (२३ नोव्हेंबर) रोजी हुतात्मा पाटील यांच्यावर अंत्यसंस्कार केले जाणार असल्याची माहिती ग्रामस्थांनी दिली.

हुतात्मा जवान संग्राम पाटील यांच्यावर गावातीलच विद्यालयाच्या पटांगणावर अंत्यसंस्कार केले जाणार आहेत. त्या पार्श्वभूमीवर ग्रामस्थांकडून तयारी सुरू आहे. ज्या ठिकाणी अंत्यसंस्कार करण्यात येणार आहेत, त्याठिकाणी चबुतरा बांधण्याचे काम सुरू आहे. संपूर्ण गावावर शोककळा पसरली असून गावात डिजिटल फलकाच्या माध्यमातून श्रद्धांजली वाहण्यात येत आहे. आमदार ऋतुराज पाटील यांनी या गावाला भेट देत विद्यालयाच्या मैदानाची पाहणी केली तसेच ग्रामस्थांना योग्य त्या सूचना देऊन कोरोना पार्श्‍वभूमीवर खबरदारी घेण्याचे आवाहन यावेळी करण्यात आले.

कुटुंबीयांना अद्याप माहिती नाही -

संग्राम पाटील सीमेवर लढत असताना शहीद झाल्याची बातमी अद्याप त्यांच्या कुटुंबियांना सांगितलेली नाही. त्यांची पत्नी दिवाळीच्या सुट्टीला आपल्या मुलांसोबत हसुर दुमाला या गावी माहेरी गेली होती. ही घटना ग्रामस्थांना समजतात त्यांच्या पत्नीला बोलावून घेतले. संग्राम हा सुरक्षित असून हॉस्पिटलमध्ये उपचार घेत असल्याचे त्यांना सांगितले आहे. मात्र शहीद झाल्याची बातमी अद्याप कुटुंबीयांच्या कानावर घातलेली नाही.

४० हजार लोक सहभागी होण्याच्या अंदाजाने बंदोबस्त -

हुतात्मा संग्राम पाटील यांच्यावर गावातील विद्यालयाच्या पटांगणावर अंत्यसंस्कार केले जाणार आहेत. त्या पार्श्वभूमीवर परिसरातील 40 हजार पेक्षा जास्त नागरिक या अंत्ययात्रेसाठी उपस्थित राहण्याचा अंदाज जिल्हा पोलीस प्रशासनाकडून व्यक्त केला जात आहे. त्यानुसार बंदोबस्ताची तयारी सुरू आहे. व्हीआयपी पार्किंग, बैठक व्यवस्था यासह सर्व जागेची पाहणी झाली असून कोरोनाच्या पार्श्‍वभूमीवर योग्य खबरदारी घेणार असल्याचं पोलीस उपनिरीक्षक सरोजनी चव्हाण यांनी सांगितलं.

गावातील सर्व व्यवहार बंद -

शहीद झाल्याची बातमी समजतात ग्रामस्थांनी सर्व व्यवहार बंद केले. तसेच संपूर्ण गावात शांतता पसरली. परिसरातील लोकांनी गावाच्या पटांगणावर गर्दी केली. तसेच परिसरातील माजी सैनिकांनी देखील निगवे खालसा या गावाकडे धाव घेतली. अंत्ययात्रेला होणारी गर्दी लक्षात घेता माजी सैनिकांनी देखील नियोजनाची तयारी सुरू ठेवली आहे.