उंबरवाडीच्या मैदानाला शहीद जोतिबा चौगुले यांचे नाव द्या, सकल मराठा महासंघाची मागणी

जम्मू काश्मीरमध्ये पाकिस्तानी सैन्याकडून झालेल्या गोळीबारात १५ डिसेंबरला हुतात्मा झालेल्या जोतिबा चौगुले यांचे नाव उंबरवाडीच्या मैदानाल द्यावे, अशी मागणी मराठा महासंघाने केली आहे.

कोल्हापूर -जम्मू काश्मीरमध्ये पाकिस्तानी सैन्याकडून झालेल्या गोळीबारात गडहिंग्लज तालुक्यातील उंबरवाडीचे जवान जोतिबा चौगुले यांना वीरमरण आले. बुधवारी शहीद चौगुले यांच्यावर गावातील एका माळावर अंत्यसंस्कार करण्यात आले. उंबरवाडीच्या माळाचे आता क्रीडांगणात रूपांतर करण्यासाठी परवानगी मिळावी आणि या क्रीडांगणाला शहीद जोतिबा गणपती चौगुले क्रीडांगण नाव द्यावे, अशी मागणी सकल मराठा महासंघाकडून करण्यात आली आहे.

हेही वाचा -'जोतिबा चौगुले अमर रहे'.... म्हणत हुतात्मा जवानाच्या पत्नीने फोडला हंबरडा

होतकरू तरुण आणि खेळाडूंना सरावासाठी हे मैदान राखीव ठेवावे. त्यामुळे महागाव आणि ऊंबरवाडी येथील तरुण, खेळाडू लष्कर, पोलीस भरती सरावासाठी याचा वापर करू शकतील. यामुळे अनेक शूर जोतिबा चौगुले या गावात तयार होतील. त्यामुळे त्वरित या माळाला क्रीडांगणाची मंजुरी देऊन त्याला शहीद जोतिबा गणपती चौगुले यांचे नाव द्यावे, अशी मागणी सकल मराठा महासंघाचे तालुकाध्यक्ष लक्ष्मीकांत मानवाडकर यांनी केली आहे. हीच खरी आमच्या वीर पुत्राला श्रद्धांजली ठरेल, असेही ते म्हणाले.

हेही वाचा -हुतात्मा जवान जोतिबा चौगुले अनंतात विलीन