कोल्हापूर - गेल्या दोन वर्षांपासून कोल्हापुरातील काही तरुण 'नो शेव्ह नोव्हेंबर' ही मोहिम राबवतात. महिनाभर दाढी न करता त्यावर होणारा खर्च वाचवून साठलेली रक्कम कॅन्सरग्रस्त रुग्णांच्या नातेवाईकांना देण्यात येते. यंदा या तरुणांनी 50 हजारांहून अधिक रक्कम गोळा करून ती 4 कॅन्सरग्रस्त रुग्णांच्या नातेवाईकांना दिली आहे.
कोल्हापुरात 'नो शेव्ह नोव्हेंबर' मोहिमेद्वारे 4 कॅन्सरग्रस्त रुग्णांना मदत
किरण गीते यांनी काही दिवसांपूर्वीच स्वतःचे केस कॅन्सरग्रस्त महिलेसाठी दान केले आहेत. त्यांच्या कार्याची दखल घेऊन नो शेव्ह नोव्हेंबर गृपकडून त्यांना यावेळी निमंत्रित करण्यात आले होते. कोल्हापूर प्रेस क्लब कार्यालय येथे आयोजित कार्यक्रमात किरण गीते यांच्या हस्ते आणि प्रेस क्लबचे अध्यक्ष मोहन मेस्त्री, सचिव मनजीत भोसले यांच्या प्रमुख उपस्थितीत ही रक्कम रुग्णांच्या नातेवाईकांना देण्यात आली.