G20 Summit: कोल्हापुरी चप्पल परदेशी पाहुण्यांना घालणार भुरळ; दिल्लीतील जी-२० परिषदेत हस्तकला बाजारात होणार विक्री

G20 Summit: आजपासून सुरू होणाऱ्या ‘जी २०’ शिखर परिषदेसाठी देशाची राजधानी नवी दिल्ली आणि प्रगती मैदानातील भारत मंडपम सज्ज झाला आहे. ‘जी २०’ शिखर परिषदेच्या निमित्तानं आयोजित हस्तकला बाजारामध्ये महाराष्ट्राची पैठणी (Paithani Saree) आणि कोल्हापुरी चप्पल (Kolhapuri Chappal) परदेशी पाहुण्यांसाठी विशेष आकर्षण ठरणार आहे.

कोल्हापूर : G20 Summit: आकर्षक आणि मजबूत कोल्हापुरी चप्पल सर्वांच्याच आकर्षणाचा केंद्र असते. परदेशातही ही चप्पल विकली जाते. अस्सल चामड्यापासून बनवलेल्या तसेच चप्पलवरील कलाकुसरीमुळे कोल्हापुरी चपलेचं सौंदर्य अधिकच खुलते. (Kolhapuri Chappal) राजधानी दिल्लीत होणाऱ्या जी-२० परिषदेच्या (G20 Summit In Delhi) निमित्तानं भरणाऱ्या हस्तकला बाजारात खास कोल्हापुरी चप्पल विक्रीसाठी उपलब्ध असणार आहे. यामुळे परदेशी पाहुण्यांनाही देखणी कोल्हापुरी चप्पल आता भुरळ घालणार आहे.

पैठणी साडीचं वैशिष्ट्य : (Importance of Paithani Saree) दिल्लीच्या प्रसिद्ध प्रगती मैदानाच्या भारत मंडपात 9 ते 10 सप्टेंबर दरम्यान हा हस्तकला बाजार भरेल. देशभरातील प्रत्येक जिल्ह्याची ओळख असलेल्या हस्तनिर्मित वस्तू या बाजारात विक्रीसाठी ठेवल्या जाणार आहेत.‌ शुद्ध रेशीम आणि सोनेरी जरीमध्ये विणकाम व दोलायमान रंग हे महाराष्ट्राचं महावस्त्र म्हणून ओळखल्या जाणाऱ्या पैठणी साडीचं वैशिष्ट्य आहे. (Paithani Saree) गोदावरीकाठी असलेल्या पैठणमध्ये तयार होणाऱ्या पैठणीचे काठ आणि पदर आकर्षक डिझाईनचे असतात. यामध्ये हातानं विणलेले सोनेरी पोपट, फुले, बैल, कमळ, मोर आदींचा समावेश असतो. नऊवारी किंवा सहावारी पैठणी स्त्रियांचं सौंदर्य अधिकच खुलवते. यात चंबा रुमाल, मधुबनी पेंटिंग्ज, लाख बांगड्या, तंजावर पेंटिंग्जपासून पैठणी साडी, कोल्हापुरी चप्पलपर्यंत अनेक उत्पादनांचं प्रदर्शन व विक्री होईल.

'एक जिल्हा, एक उत्पादन': जी २० परिषदेच्या या प्रदर्शनाच्या माध्यमातून राज्य व केंद्रशासित प्रदेशांद्वारे प्रदर्शित केल्या जाणाऱ्या प्रत्येक उत्पादनाची बाजारपेठ क्षमता वाढवण्याचा केंद्र सरकारचा प्रयत्न आहे. या बाजाराच्या माध्यमातून देशभरातील सर्वोत्कृष्ट हस्तकला वस्तू एकाच छताखाली विक्रीसाठी उपलब्ध होतील. 'एक जिल्हा, एक उत्पादन' (ओडीओपी) योजनेंतर्गत उत्पादनांवर विशेष लक्ष केंद्रित करण्यात आलं आहे.

कोल्हापुरी चप्पलची खासियत पाहता, देश आणि जगभरातून या चपलेला मोठ्या प्रमाणात मागणी आहे. मात्र सध्या चर्मकार उद्योजक संकटात आहे. केंद्र आणि राज्य सरकारनं महामंडळांकडून कारागिरांकडून तयार होणाऱ्या कोल्हापुरी चपलेचं उत्पादन थेट खरेदी करावं. यामुळे या व्यवसायाला चालना मिळेल तसेच निर्यात ही वाढेल. सध्या कोल्हापूर जिल्ह्यातील कारागिरांकडं पुरेशी साधनसामग्री उपलब्ध नसल्यानं, नवोद्योजकांना या व्यवसायात येण्यासाठी अडचणी निर्माण होत आहेत. केंद्र आणि राज्य सरकारनं कारागिरांच्या अडचणी सोडवून या उद्योगाला चालना द्यावी. - भोपाल शेटे, उत्पादक व विक्रेते

जिल्ह्यातील 32 कारागिरांना जीआय मानांकन प्रमाणपत्र :(Kolhapur News) केंद्र सरकारच्या हस्तकला आयुक्त कार्यालयानं कोल्हापूर जिल्ह्यातील 32 कारागिरांना जीआय मानांकन प्रमाणपत्र मिळालं आहे. भौगोलिक स्थान निश्चिती निकषानुसार कोल्हापुरी चप्पल बनवणारं शासनानं अधिकृत केलेल्या कारागिरांना जी आय मानांकन आणि प्रमाणपत्र देण्यात येणार आहे. कोल्हापूर चप्पलला राष्ट्रीय स्तरावर हस्तकलेचा उत्तम नमुना म्हणून मान्यता मिळाली आहे. आता आंतरराष्ट्रीय पाहुण्यांनाही जी-20 परिषदेच्या निमित्तानं कोल्हापुरी हस्तकाला पाहायला मिळणार आहे. यामुळे भविष्यात कोल्हापुरी चप्पलची निर्यात वाढण्याची शक्यता वर्तवण्यात येत आहे.

हेही वाचा -