कोल्हापूर : शिये गावाच्या पुनर्वसनासाठी आंदोलकांनी घेतली नदीत उडी

कोल्हापूर शहरालगत असणाऱ्या शिये गावाला देखील दरवर्षी येणाऱ्या महापुराचा फटका बसतो. त्यामुळे गावाचे पुनर्वसन करावे, अशी मागणी आता जोर धरू लागली आहे. आज या मागणीसाठी शेतकरी संघटनेच्या वतीने पंचगंगा नदीच्या घाटावर आत्मदहन आंदोलन करण्यात आले.

कोल्हापूर - महापुराचा फटका यंदा जिल्ह्यातील सर्वच गावांना बसला आहे. करवीर तालुक्यातील शिये हे गाव देखील पाण्याखाली बुडाले होते. या गावाचे पुनर्वसन करावे, या मागणीसाठी आज (सोमवारी) शेतकरी संघटनेने पंचगंगा नदी घाटावर आंदोलन केले. दरम्यान आंदोलनकर्त्यांनी आक्रमक पवित्रा घेत थेट पंचगंगा नदीच्या पात्रात उडी घेतली. यावेळी पोलीस आणि महानगरपालिकेचे अग्निशामन दलाच्या वतीने या आंदोलनकर्त्यांना बाहेर काढण्यात आले. दरम्यान झालेल्या प्रकारामुळे पोलिसांची देखील तारांबळ उडाली.

यंदा महापुरामुळे जिल्ह्यातील अनेक गावे पाण्याखाली गेली. कोल्हापूरच्या इतिहासात प्रथमच विक्रमी महापुराची नोंद करण्यात आली आहे. दरम्यान, या महापुराचा फटका दरवर्षी पंचगंगा नदीच्या काठावर असणाऱ्या अनेक गावांना बसतो. कोल्हापूर शहरालगत असणाऱ्या शिये गावाला देखील दरवर्षी येणाऱ्या महापुराचा फटका बसतो. त्यामुळे गावाचे पुनर्वसन करावे, अशी मागणी आता जोर धरू लागली आहे. आज या मागणीसाठी शेतकरी संघटनेच्या वतीने पंचगंगा नदीच्या घाटावर आत्मदहन आंदोलन करण्यात आले. शिये गावाचे शंभर टक्के पुनर्वसन करावे, अशी मागणी करत आंदोलनकर्त्यांनी थेट नदीपात्रात उडी घेतली. यावेळी पोलिसांची चांगलीच तारांबळ उडाली. दरम्यान, प्रसंगावधान राखत पोलिसांनी आणि कोल्हापूर महानगरपालिकेच्या अग्निशमन दलाच्या जवानांनी आंदोलनकर्त्यांना बाहेर काढले. दरम्यान जोपर्यंत गावाचे पुनर्वसन होत नाही. तोपर्यंत लढा सुरूच राहील. तसेच या मागणीसाठी आत्मसमर्पण करण्यासाठीही मागेपुढे पाहणार नाही, असा इशारा आंदोलनकर्त्यांनी दिला आहे.