कोल्हा'पूर'; पूरग्रस्तांच्या मदतीसाठी नौदलाचे अतिरिक्त 15 पथके आज होणार दाखल

स्थानिक प्रशासनाबरोबरच ओडिसा, पंजाब व गुजरात राज्यातील राष्ट्रीय आपत्ती व्यवस्थापन दलाचे 22 तसेच नौदलाच्या 26, तटरक्षक दलाचे सांगलीमध्ये 2 व कोल्हापुरात 9 पथके, सैन्यदलाचे 8 पथके, राज्य आपत्ती व्यवस्थापन दलाचे सांगलीमध्ये दोन तर कोल्हापुरात एक अशी तीन पथके कार्यरत आहेत.

मुंबई- कोल्हापूर आणि सांगली भागात पुराचे पाणी ओसरत असले तरी अजूनही शेकडो लोक पुरात अडकले आहेत. त्यामुळे विशाखापट्टणम येथून नौदलाचे अतिरिक्त पथक कोल्हापूरला दाखल होणार असल्याची माहिती मुख्यमंत्री देवेंद्र फडणवीस यांनी दिली आहे. दुपारपर्यंत ही पथके दाखल होतील असे मुख्यमंत्र्यांनी ट्विट करून सांगितले आहे.

कोल्हापूर आणि सांगलीमध्ये जिल्हा आपत्ती प्रतिसाद दलाचे जवानासह महसूल, जलसंपदा, पोलीस, सार्वजनिक बांधकाम विभाग यासह इतर सर्व विभागाचे कर्मचारी व अधिकारी अहोरात्र पूरग्रस्तांच्या बचाव कार्यासाठी प्रत्यक्ष ठिकाणी उपस्थित आहेत. तसेच पुरग्रस्तांच्या मदतीसाठी पुणे विभागीय कार्यालयाने विभागातील सर्व कर्मचारी आणि अधिकाऱ्यांच्या सुट्ट्या रद्द केल्या आहेत. शनिवार, रविवार आणि सोमवारी ही प्रशासकीय यंत्रणा कार्यरत राहणार आहेत.

स्थानिक प्रशासनाबरोबरच ओडिसा, पंजाब व गुजरात राज्यातील राष्ट्रीय आपत्ती व्यवस्थापन दलाचे 22 तसेच नौदलाच्या 26, तटरक्षक दलाचे सांगलीमध्ये 2 व कोल्हापुरात 9 पथके, सैन्यदलाचे 8 पथके, राज्य आपत्ती व्यवस्थापन दलाचे सांगलीमध्ये दोन तर कोल्हापुरात एक अशी तीन पथके कार्यरत आहेत. तसेच कोल्हापुरात 76 तर सांगलीमध्ये 90 बोटींद्वारे बचावकार्य सुरू आहे.

पूरपरिस्थितीबद्दल राज्य शासनाने केंद्र शासनाशी तत्काळ संपर्क साधल्यामुळे सैन्य दलाची व तटरक्षक दलाची पथके कार्यरत झाली आहेत. मदत व पुनर्वसन विभागाचे आपत्ती नियंत्रण कक्ष चोवीस तास कार्यरत असून वेळोवेळी सांगली व कोल्हापूर जिल्ह्यातील परिस्थितीचा आढावा घेण्यात येत आहे. तसेच केंद्र शासनाबरोबर मदती संदर्भात संपर्कात असल्याची माहिती राज्याचे मुख्य सचिव अजोय मेहता यांनी दिली.