कोल्हापूर - म्हाडाचे अध्यक्ष समरजीत घाटगे यांनी मुख्यमंत्र्यांच्या उपस्थितीत कागल मतदारसंघातून आज प्रत्यक्षपणे विधानसभेच्या प्रचाराचे रणशिंग फुंकले. घाटगे यांचे वडील विक्रमसिंह घाटगे यांच्या पुतळा अनावरण प्रसंगी समरजीत यांनी आज कागलमध्ये मोठे शक्तिप्रदर्शन केले.
कार्यक्रमाच्या निमित्ताने कागल मार्गावर समरजीत घाटगे यांनी मुख्यमंत्र्यांच्या स्वागताचे फलक उभे केले होते. याच फलकांच्या मध्ये आमदार हसन मुश्रीफ यांनी सुद्धा परमनंन्ट आमदार अशा आशयाचे फलक उभे करून मुख्यमंत्री देवेंद्र फडणवीसांचे लक्ष वेधण्याचे प्रयत्न केले. मात्र, मुख्यमंत्र्यांनी या फलकावरून मुश्रीफ यांच्यावर चांगलीच टीका केली. जनतेने एकदा मनात आणले तर कोणीही परमनन्ट होऊ शकत नाही. जो जनतेची दिशाभूल करतो त्याला जनता घरी बसल्याशिवाय राहत नाही, अशा शब्दात त्यांनी मुश्रीफांवर निशाणा साधला. यावेळी पालकमंत्री चंद्रकांत पाटील यांनी अप्रत्यक्षपणे समरजीत घाटगे युतीचे उमेदवार असल्याचे घोषित केले.
लोकसभा निवडणुका पार पडल्यानंतर कागल तालुक्यामध्ये आगामी विधानसभेच्या निवडणुकीचे वातावरण चांगलेच तापले आहे. कागल तालुक्याला राजकारणाचे विद्यापीठ म्हटले जाते. राजकारणाच्या याच विद्यापीठात आज मुख्यमंत्री फडणवीस यांनी मुश्रीफ यांच्यावर केलेल्या अप्रत्यक्ष टिकेनंतर या मतदारसंघातील राजकीय समीकरणे बदलतील, अशी चर्चा कोल्हापुरात रंगताना दिसत आहे.
