कोल्हापूर- इचलकरंजी नगरपालिकेत स्वत:ला पेटवून घेतल्याने एका सामाजिक कार्यकर्त्याचा मृत्यू झाला आहे. नरेश भोरे, असे या सामाजिक कार्यकर्त्याचे नाव असून दोन दिवसापूर्वी त्यांनी नगरपालिकेला आत्मदहनाचा इशारा दिला होता. मात्र, त्याची दखल घेतली नसल्याने भोरे यांनी स्वतःला पेटवून घेतले. या घटनेत त्यांचा मृत्यू झाला आहे.
या घटनेनंतर संपूर्ण इचलकरंजी शहर हादरले आहे. ४ दिवसापूर्वी इचलकरंजी येथील शहापूर रस्त्यावरून मेलेले डुक्कर घंटागाडीतून नेण्याऐवजी घंटागाडीला बांधून रस्त्यावरून फरफटत ओढून नेले जात होते. हा प्रकार सामाजिक कार्यकर्ते नरेश भोरे यांच्या निदर्शनास आला. त्यांनी नागरिकांच्या आरोग्याचा विचार करून मृत डुक्कर बांधून ओढत नेणाऱ्या घंटागाडी चालकास अटकाव केला. त्यावरून संबंधित गाडी चालकाने त्यांना शिवीगाळ करीत मारहाण केली होती. तसेच, त्याच्यावर दहशत निर्माण करून भोरे यांना चक्क मेलेले डुकर उचलून घंटागाडीत टाकण्यास भाग पाडले होते.