कोल्हापूर - जिल्ह्यात पुराची स्थिती आणखीनच गंभीर होत चालली आहे. पंचगंगा नदीने धोक्याची पातळी ओलांडली असून अनेक सखल भागात आणि नदीकाठच्या गावात पुराचे पाणी शिरले आहे. त्यामुळे जिल्ह्यातील ४ हजारांपेक्षा जास्त नागरिकांना सुरक्षित स्थळी हलवण्यात आले आहे.
कोल्हा'पूर' स्थिती गंभीर; ४ हजारांपेक्षा अधिक नागरिकांना सुरक्षित स्थळी हलवले
गेल्या १० दिवसांपासून कोल्हापुरात पावसाने हाहाकार माजवला आहे. त्यामुळे राधानगरी धरणाचे सातही दरवाजे उघण्यात आले आहे. त्यामुळे धरणातून प्रतिसेकंद ११ हजार ४०० क्युसेक पाण्याचा विसर्ग भोगावती नदी पात्रात केल्या जात आहे. त्यामुळे नद्यांच्या पाणीपातळीत वाढ होत आहे. राजाराम बंधाऱ्यांची पाणीपातळी ४६.४ इंचापर्यंत पोहोचली आहे. तसेच जिल्ह्यातील एकूण ९५ बंधारे पाण्याखाली गेले आहेत. त्यामुळे कोल्हापूर जिल्हा प्रशासन आणि आपत्ती निवारण प्राधिकरण आपत्तीला तोंड देण्यासाठी सज्ज झाले आहे.