जालना- देवमूर्ती ग्रामपंचायतीच्या हद्दीत येत असलेल्या चौधरी नगर परिसरात नागरिकांच्या घरात पाणी जात आहे. त्यामुळे या परिसरातील नागरिकांचे आरोग्य धोक्यात आले आहे. मात्र याबाबत ग्रामपंचायत लक्ष देण्यास तयार नसल्यामुळे भविष्यात हा भाग विविध साथीच्या आजारांनी घेरल्या जाण्याची शक्यता नाकारता येत नाही.
चौधरी नगरमध्ये रस्त्यावरील पाणी घरात.
जालना शहराला लागूनच मंठा रोडवर चौधरी नगर ही सुमारे दहा वर्षांपूर्वी नवीन वस्ती वसली आहे. सुसज्ज इमारती या भागांमध्ये आहेत. मात्र हा भाग जालना तालुक्यातील देवमूर्ती या ग्रामपंचायत अंतर्गत येतो. या भागातील उंच टेकडीवरुन सर्व पाणी जालना शहराच्या दिशेने वाहत येते. त्यामुळे रिकाम्या जागेमध्ये मोठ्याप्रमाणात पाण्याचे डोह साचतात. याठीकाणी अनेक घरांच्या बाजूने चार ते पाच फूट पाणी साचले आहे.