जालना - निवडणूक आयोगाने सुचवल्यानुसार सध्या मतदार पडताळणी कार्यक्रम सुरू आहे. त्यानुसार 13 फेब्रुवारी 2020 पर्यंत हे काम पूर्ण करण्याच्या सूचना आयोगाने दिल्या आहेत. यासाठी तहसील स्तरावर पर्यवेक्षक व मतदान केंद्रस्तरावर अधिकाऱ्यांना सर्व जबाबदाऱ्या वाटून देण्यात आल्या आहेत. मात्र, कामात टाळाटाळ करणाऱ्या सहा कर्मचाऱ्यांवर तहसीलदार श्रीकांत भुजबळ यांनी कारवाई केली आहे. नायब तहसीलदार दिलीप सोनवणे यांच्या तक्रारीवरून या अधिकाऱ्यांविरोधात तालुका पोलीस ठाण्यात मध्यरात्री एक वाजेच्या सुमारास गुन्हे दाखल करण्यात आले आहेत.
मुख्य निवडणूक आयोगाने मतदार पडताळणी कार्यक्रमासंदर्भात 18 नोव्हेंबरला पत्र पाठवून मतदार पडताळणी कार्यक्रम राबवण्याचे सुचवले आहे. त्यानुसार मतदार यादी भागातील प्रत्येक मतदाराची त्याच्या घरी जाऊन प्रत्यक्ष भेट घेणे आणि संबंधित मतदारांचा तपशील पडताळणी करण्याचे आयोगाचे निर्देश आहेत. तसेच संबंधित काम 13 फेब्रुवारी पर्यंत पूर्ण करण्याच्या सुचना देखील देण्यात आल्या आहेत. तरीही सहा कर्मचाऱ्यांनी आत्तापर्यंत कोणतेही काम न केल्याने या कर्मचाऱ्यांवर लोकप्रतिनिधीत्व अधिनियम 1950 कायद्यातील कलम 32 नुसार गुन्हा नोंदवण्यात आल्याची माहिती पोलीस प्रशासनाने दिली आहे. तसेच यामुळे हे अधिकारी शिक्षेस पात्र ठरत असल्याचे तक्रारीत नमूद करण्यात आले आहे.