जालना - नगरपालिकेचे नाला स्वच्छतेकडे असलेले दुर्लक्ष आणि यातूनच नाल्यांवर झालेल्या अतिक्रमणामुळे रात्री पडलेल्या पावसाचे पाणी आजी माजी मंत्र्यांच्या बंगल्यात शिरले आहे. तर आरोग्य मंत्री राजेश टोपे यांच्या घराकडे जाण्यासाठी गुडघ्याइतक्या पाण्यातून वाट काढावी लागत आहे. मंत्र्यांच्या बंगल्यांची ही परिस्थिती तर गरिबांच्या घराचे काय? हा प्रश्न सर्वसामान्य नागरिक विचारत आहेत. या सर्व प्रकाराकडे नगरपालिकेने सोयीस्कर दुर्लक्ष केल्यामुळे नाल्यावर झालेली अतिक्रमणे आणि नाल्यात वाढलेली झाडे यामुळे हे पाणी तुंबून मंत्र्यांच्या घरात शिरले आहे.
जुन्या जालन्यातील भाग्यनगर ही एक उच्चभ्रू वस्ती आहे. माजी मंत्री अर्जुन खोतकर आणि आरोग्य मंत्री राजेश टोपे यांची याच भाग्यनगरमध्ये उत्तर आणि दक्षिण दिशेला बंगले आहेत. याच भाग्यनगरच्या कोपऱ्यावर नाल्यावर अतिक्रमण झाल्यामुळे उड्डाणपुलाच्या खाली मोठ्या प्रमाणात पाणी तुंबत आहे. तसेच हे पाणी दुसरीकडून वाट काढून पुढे गेल्यानंतर दुकानांमध्ये हे शिरले आहे. या दुकानांचे प्रचंड नुकसान झाले आहे. या नाल्यात झाडं जास्त असल्यामुळे पाणी वाहून जाण्यासाठी जागाच नाही. याच नाल्याच्या काठावर पुढे भोईपुरा आहे. या नाल्याचे पाणी रात्री या घरांमध्ये शिरल्यामुळे या परिवारांना रात्रभर जागे रहावे लागले. यात भांडे वाहून गेली, बसायलाही जागा राहिली नाही. अशा विचित्र परिस्थितीत येथील नागरिकांनी रात्र काढली आहे.