बदनापूर तालुक्यात स्वातंत्र्य दिनानिमित्त कोरोना योद्ध्यांचा गौरव

बदनापूर तहसील कार्यालयात मुख्य ध्वजारोहणाचा कार्यक्रम तहसीलदार छाया पवार, पोलीस निरीक्षक मारुती खेडकर, गटविकास अधिकारी विठठल हरकळ, तालुका कृषी अधिकारी व्यंकट ठक्के आदींच्या प्रमुख उपस्थित सोशल डिस्टन्सींग ठेऊन पार पडला.

जालना - कोरोनाच्या पार्श्वभूमीवर सोशल डिस्टन्सिंग राखत स्वातंत्र्य दिनाचा उत्सव तालुकाभर साधेपणाने साजरा करण्यात आला. यानिमित्त तहसील कार्यालयात कोरोना योद्ध्यांचा सत्कार महसूल प्रशासनातर्फे करण्यात आला. तसेच शहीद सैनिकांच्या मात्या-पित्यांचा सन्मान त्यांच्या घरी जाऊन करण्यात आला, तर तालुक्यातील अंबडगाव येथे अँटिजन चाचणी शिबीर घेण्यात आले. येथील एका शाळेने ऑनलाइन देशभक्तीपर स्पर्धा घेऊन विद्यार्थ्यांनाही सहभागी करून घेतले होते.

स्वातंत्र्य दिनानिमित्त दरवर्षी भरगच्च कार्यक्रम, शाळांचा प्रभातफेऱ्या असतात. यंदा मात्र कोरोना विषाणूच्या पार्श्वभूमीवर हा उत्सव साधेपणाने मात्र मोठया उत्साहात व नवनवीन संकल्पना राबवत पार पडला. बदनापूर तहसील कार्यालयात मुख्य ध्वजारोहणाचा कार्यक्रम तहसीलदार छाया पवार, पोलीस निरीक्षक मारुती खेडकर, गटविकास अधिकारी विठठल हरकळ, तालुका कृषी अधिकारी व्यंकट ठक्के आदींच्या प्रमुख उपस्थित सोशल डिस्टन्सींग ठेऊन पार पडला. त्यानंतर तालुक्यात कोरोना विषाणूचा मुकाबला करणाऱ्या विविध कोरोना योध्दांचा मान्यवरांच्या हस्ते सत्कार करण्यात आला.

यावेळी कोरोना विषाणूचा प्रादूर्भाव रोखण्यासाठी उल्लेखनिय कार्य करणाऱे आरोग्य विभागाचे वैद्यकीय अधिकारी डॉ. सचिन कुंभार, डॉ. कृष्णा सरोदे, डॉ. दीपक मलेचा, डॉ.उज्ज्वला चव्हाण, डॉ. सुरेखा सर्जे, रवी बोंद्रे, मनिषा मिसाळ, सलीम शेख, कोकीळा मदन, नगर पंचायतचे रशीद पठाण, मिलींद दाभाडे, विजय पाखरे, दस्तगीर सय्यद, लक्ष्मण पवार स्वच्छता कर्मचारी भगवान शेळके, मुनीर शहा, गौरव देशमुख, विकास होर्शिळ, फकिरचंद मगरे पोलिस प्रशासनाचे पोलिस उपनिरीक्षक पूजा पाटील, ढिल्पे, सुपेकर, जाधव, अनिल चव्हाण, शिवाजी भगत, मनोज निकम, काळुसे यांचा महसूल प्रशासनाच्या वतीने विशेष सत्कार करण्यात आला.

त्याचप्रमाणे स्वातंत्रयदिनाचे औचित्य साधून तालुक्यातील सोमठाणा येथील शहीद लष्करी जवान सुरेश कदम यांच्या घरी स्वत: तहसीलदार छाया पवार यांनी जाऊन त्यांचे आई गयाबाई कदम व वडील केशवराव कदम यांचाही सत्कार करून गौरव करण्यात आला. तालुक्यातील अंबडगाव येथे सरपंच राजेशबापू जऱ्हाड यांनी स्वातंत्र्य दिनाचे औचित्य साधून अंबडगाव येथील आरोग्य उपकेंद्रात अँटीजन कोरोना चाचणी शिबिर आयोजित करून गावकऱ्यांच्या आरोग्याची तपासणी केली. यावेळी आरोग्य विभागाचे डॉ. बी. बी. शेख, पी.जी. मिर्झा, गीता बोचरे यांनी आरोग्य तपासणी करत लक्षणे असलेल्या 15 जणांची अँटीजन चाचणी केली असता दिलासादायक बाब म्हणजे सर्व चाचण्या निगेटिव्ह आल्या असल्यामुळे समाधान व्यक्त करण्यात आले.

बदनापूर शहरातील नगर पंचायत येथे नगराध्यक्ष प्रदीप साबळे, मुख्याधिकारी पल्लवी अंभोरे यांच्या उपस्थितीत पोलिस ठाणे येथे पोलिस निरीक्षक मारुती खेडकर, सहनिरीक्षक नित्यानंद उबाळे तर कला, विज्ञान व वाणिज्य महाविद्यालय येथे प्राचार्या डॉ. एम. डी. पाथ्रीकर, डॉ. शेख एस. एस., डॉ. खान एन. जी. आदींच्या उपस्थितीत सोशल डिस्टन्सींग ठेवत ध्वजारोहण करण्यात आले. येथील पाथ्रीकर कॅम्प्समध्ये असलेल्या टिव्ंकल स्टार स्कूलमध्ये ऑनलाईन गुगल मिट तसेच अन्य ॲपचा वापर करून विद्यार्थ्यांसाठी अभिनव पध्दतीने ऑनलाईनरीत्या अंताक्षरी स्पर्धा, निबंध स्पर्धा, क्विझ कॉम्पीटेशन, स्पर्धा घेऊन विद्यार्थ्यांनाही स्वातंत्र दिन कार्यक्रमात ऑनलाईनरित्या सहभागी करून घेतल्यामुळे या विद्यार्थ्यांनीही स्वातंत्र दिनाच्या उत्सवात सहभाग नोंदवता आला.