जालना जिल्ह्यातील 580 ग्रामसेवक आजपासून संपावर

विविध मागण्यांसाठी जालना जिल्ह्यातील ग्रामसेवकांनी काम बंद आंदोलन पुकारले आहे.

जालना -सेवेत रुजू होताना भरलेली अनामत रक्कम परत द्यावी, विनाकारण ग्रामसेवकांवर होणाऱ्या कारवाया थांबवाव्यात या आणि अन्य मागण्यांसाठी जिल्ह्यातील 580 ग्रामसेवक आजपासून (दि. 1 ऑक्टोबर) संपावर गेले आहेत. याबाबत मुख्य कार्यकारी अधिकारी निमा अरोरा यांनी बैठक घेऊन आश्वासन दिले आहे. मात्र, लेखी आश्वासन मिळेपर्यंत काम न करण्याचा पवित्रा ग्रामसेवकांनी घेतला आहे.

जालना जिल्हा परिषदेमध्ये नियमावर बोट ठेवून काम करणाऱ्या प्रशासकीय अधिकारी म्हणून निमा अरोरा सर्वपरिचित आहेत. मात्र ,त्यांच्या कामाचा बडगा पाहता गेल्या दोन वर्षांमध्ये अनेक ग्रामसेवक निलंबित झाले आहेत. असंख्य ग्रामसेवकांच्या विभागीय चौकशी सुरू आहे .मात्र, हे होत असतानाच जिल्ह्यातील सुमारे 90 टक्के ग्रामपंचायती ऑनलाइन देखील झाल्या आहेत. याच्या उलट ग्रामसेवकांच्या सुरू असलेल्या विभागीय चौकशा आणि दप्तर पडताळणीमध्ये अनेक ग्रामपंचायती मागे असल्याचे दिसून आले आहे. तर काही ग्रामसेवकांनी पाणीपुरवठा योजना आणि स्वच्छ भारत सारख्या योजनांमधून अंग झटकल्यामुळे त्यांना विभागीय चौकशींना सामोरे जावे लागत आहे.

याचा परिणाम म्हणून ग्रामसेवकांनी वेळोवेळी त्यांच्या मागण्या प्रशासनाकडे मांडल्या होत्या. मात्र, त्या अद्यापपर्यंत पूर्ण झाल्या नाहीत. त्यामध्ये 2008 मध्ये लागलेल्या ग्रामसेवकांनी अनामत रक्कम म्हणून जिल्हा परिषदेकडे दहा हजार रुपये जमा केले होते. हे नियमानुसार ते त्यांना परत मिळायला हवे होते. मात्र, आजपर्यंत ती रक्कम परत मिळाली नाही, ही प्रमुख मागणी होती. तसेच दप्तर पडताळणीच्या नावाखाली देखील ग्रामसेवकांवर विनाकारण आरोप होत आहेत आणि त्यांच्या चौकशा सुरू झाल्या आहेत. ग्रामसेवकाला निलंबित केले तर त्यासोबत सरपंचाला देखील निलंबित केले पाहिजे, अशी मागणीही ही ग्रामसेवकांची आहे. जेणेकरून गावांमधील कामांमध्ये दोषी आढळलेल्या सरपंचावर ही कार्यवाही होईल. या आणि अन्य मागण्यांसाठी आज सर्व ग्रामसेवक संपावर गेले आहेत.

हेही वाचा -वाल्हा प्रकल्पात मोठा पाणी साठा: सांडवा गळतीमुळे भीतीचे वातावरण