जालना- जिल्ह्यामध्ये पावसाळ्याला सुरुवात झाली आहे. त्यामुळे शेतकऱ्यांनीही खरीप हंगामाच्या पेरणीला सुरुवात केली आहे. त्यामुळे पिकांसाठी लागणाऱ्या खतांची आवकही सध्या सुरू झाली आहे. जालना रेल्वे स्थानकावर मालगाडीच्या माध्यमातून हा खत येत आहे. मात्र, यावर्षी खताचा तुटवडा होण्याची शक्यता, खत कंपनीच्या अधिकाऱ्यांनी वर्तविली आहे.
जालना रेल्वे स्थानकावर मागील महिन्यामध्ये दोन मालगाडया आल्या होत्या. यामध्ये सम्राट कंपनीचा डीएपी खत ३११० टन आणि २० -२०- ०-१३ या नावाचे १ हजार ८५० टन खत आला आहे. लवकरच १००० टन युरिया आणि १६०० टन १० -१०- २६ हा खत येणार आहे. सद्या परिस्थितीमध्ये युरियाला जास्त मागणी असल्यामुळे आणि पुरवठा कमी होत असल्यामुळे बाजारामध्ये या खताची टंचाई होण्याची शक्यता निर्माण झाली आहे. प्यारा दीप कंपनीचा खत हा ओरिसा येथून तर झूआरी कंपनीचा खत गोवा येथून आला आहे. जिल्ह्यामध्ये ठोक विक्रेत्यांना या खताचे वाटप सुरू असून उर्वरित खत संबंधीत कंपनीच्या गोदामांमध्ये ठेवला जाणार आहे. त्यामुळे या खतांसाठी शेतकऱ्यांची मागणी होताच त्यांना पुरवठा करणे सोपे होणार आहे.
दरम्यान मागच्या वर्षीच्या तुलनेत यावर्षी खत कंपन्यांसाठी अडचणीची वेळ आहे. कारण मागील वर्षी शेतकऱ्यांनी पेरणीचे नियोजन मे महिण्यातच केले होते. आणि त्यानूसार जूनमध्ये पेरण्या सुरू केल्या होत्या. परंतु यावर्षी शासनाने जून महिन्यापर्यंत बियाणे विक्रीस बंदी घातली होती. पर्यायाने पेरण्या पुढे ढकल्यागेल्या. यामुळे खत कंपनीलाही नियोजन करण्यासाठी पुरेसा वेळ मिळाला नाही. परिणामी, यावर्षी खताचा तुटवडा होण्याची शक्यता कंपनीच्या अधिकाऱ्यांनी वर्तविली आहे.