जालना - जिल्हा परिषदेचे सभागृह म्हणजे 'टाइमपास ठिकाण' झाले असल्याचे चित्र मंगळवारी झालेल्या स्थायी समितीच्या बैठकीत पाहायला मिळाले. जिल्ह्यामध्ये गटविकास अधिकाऱ्यांच्या कामचुकारपणाबद्दल त्यांना 'चले जाव'चा नारा देत, जिल्हा परिषद अध्यक्षांनी चांगलेच धारेवर धरले. यावेळी अध्यक्ष अधिकाऱ्यांना रागवत असतानाच कर्मचारी मात्र मोबाईलवर क्रिकेटची मॅच पाहण्यात गुंग असल्याचे दिसून आले.
कै. यशवंतराव चव्हाण सभागृहामध्ये मंगळवारी दुपारी दोन वाजता स्थायी समितीची बैठक आयोजित करण्यात आली होती. दुपारी 3 वाजून पंचवीस मिनिटांनी ही बैठक सुरू झाली. मागील महिन्यात पाणीपुरवठा मध्ये झालेल्या हलगर्जीपणाबद्दल सर्वच बीडीओंना अध्यक्ष, उपाध्यक्ष धारेवर धरत होते. एवढेच नव्हे तर इथे टाईमपास करायला येता का? का विनाकारण वेळ घालविता? निघून जा? अशा भाषेत जिल्हा परिषद अध्यक्ष अनिरुद्ध खोतकर यांनी गटविकास अधिकाऱ्यांना झापले. हे सुरु असतानाच कर्मचारी मात्र मोबाईलवर भारत आणि बांगलादेश दरम्यान सुरू असलेल्या क्रिकेटचा सामना पाहण्यात गुंग झाले होते.
प्राप्त माहितीनुसार मंठा येथील गट विकास अधिकारी संजय पाटील हे रजेवर असल्यामुळे त्यांचे प्रतिनिधी असलेले कर्मचारी या सभेला हजर होते. मात्र त्यांना अध्यक्ष काय बोलत आहेत याच्याशी काही देणे घेणे नव्हते. ज्यावेळी अध्यक्ष खोतकर हे गटविकास अधिकाऱ्यांना झापत होते त्याच वेळी हे कर्मचारी मॅच पाहण्यात गुंग होते. त्यामुळे हे सभागृह म्हणजे अधिकाऱ्यांसाठी एक टाइमपास चे ठिकाण असल्याचे मंगळवारी दिसून आले. तर अध्यक्षांनी या अधिकाऱ्यांना निघून जा म्हटल्यामुळे निश्चितच हे टाईमपास चे ठिकाण आहे यावर शिक्कामोर्तब झाले आहे असेच म्हणावे लागेल.