लिंबूवर्गीय फळबागांच्या ऑनलाईन नोंदणीसाठी सिट्रसनेट प्रणाली सुरू; बदनापुरातील मोसंबी संशोधन केंद्राची पहिली नोंदणी

लिंबूवर्गीय फळबागांची ऑनलाईन नोंदणी करण्याची मोहीम १ डिसेंबरपासून सुरू करण्यात आली आहे. सिट्रसनेट या प्रणालीद्वारे मराठवाडयातील औरंगाबाद, जालना, नांदेड, परभणी आदी जिल्ह्यातील शेतकऱ्यांना फळाच्या निर्यातीची संधी चालून आली आहे. यासाठी सर्व शेतकऱ्यांनी नोंदणी करणे गरजेचे आहे.

जालना -महाराष्ट्र शासनाने कृषी उत्पादनांच्या नोंदणीसाठी असलेल्या हॉर्टनेट या संगणक प्रणालीत आता 'सिट्रसनेट' या श्रेणीची भर पाडली आहे. यावर लिंबूवर्गीय फळ बागांची ऑनलाईन नोंदणी करण्यात येणार आहे. या प्रणालीवर राज्यात सर्वात प्रथम नोंदणी बदनापूर येथील मोसंबी संशोधन केंद्राने केली असून या मोसंबी बागेला एक विशिष्ट असा नंबरदेखील मिळाला आहे.

सिट्रसनेट या प्रणालीद्वारे मराठवाडयातील औरंगाबाद, जालना, नांदेड, परभणी आदी जिल्ह्यातील शेतकऱ्यांना फळाच्या निर्यातीची संधी चालून आली आहे. यासाठी सर्व शेतकऱ्यांनी नोंदणी करणे गरजेचे आहे. बदनापूर येथील मराठवाडा कृषी विदयापीठाच्या मोसंबी संशोधन केंद्रातील मोसंबी बागेची नोंदणी करण्यासाठी कुलगुरू डॉ. ए. एस. ढवन आणि संचालक संशोधन डॉ. डी. पी. वासकर यांच्या मार्गदर्शनाखाली केंद्राचे अधिकारी व कृषी संशोधक डॉ. संजय पाटील यांनी पुढाकार घेतला.

हेही वाचा -विद्यार्थ्यांची उपस्थिती वाढवण्यासाठी लावले प्राध्यपकांचे मासिक वेतन सांगणारे फलक

या बाबत माहिती देताना डॉ. संजय पाटील म्हणाले की, "द्राक्षांच्या निर्यातीसाठी ग्रपेनेट, डाळींबासाठी अनारनेट, आंब्यासाठी मँगोनेट, भाजीपाल्यासाठी व्हेजनेट या ऑनलाईन प्रणाली विकसति केल्यानंतर भारताच्या शेतमालाची निर्यात वाढण्यास मदत होणार आहे. शेतमालाच्या निर्यातीसाठी कृषी विभाग आणि कृषी विदयापीठ पावले उचलत आहे" लिंबूवर्गीय फळबागांची ऑनलाईन नोंदणी करण्याची मोहीम १ डिसेंबरपासून सुरू करण्यात आली आहे. शेतकऱ्यांनी याचा फायदा घेऊन जास्तीत जास्त बागांची नोंदणी करावी, असे आवाहनही त्यांनी केले आहे.