औरंगाबाद विभागाचे आयुक्त सुनील केंद्रेकरांची जालन्याला भेट, आरोग्यविषयक कामाचा घेतला आढावा

औरंगाबाद विभागाचे आयुक्त सुनील केंद्रेकर यांनी आज (गुरूवार) जालना जिल्ह्याचा आरोग्यविषयक आढावा घेतला.

जालना - औरंगाबाद विभाचे आयुक्त सुनील केंद्रेकर यांनी आज (गुरूवार) जालना जिल्ह्याचा आरोग्यविषयक आढावा घेतला. जालन्यात आल्याबरोबर त्यांनी सामान्य रुग्णालयात सुरू असलेल्या विविध कामांसंदर्भात जिल्हाधिकाऱ्यांसह विविध अधिकाऱ्यांकडून कामाचा आढावा घेतला.

कोरोनाच्या पार्श्वभूमीवर औरंगाबाद विभाचे आयुक्त सुनील केंद्रेकर यांनी आज जालना जिल्ह्याला भेट दिली. यावेळी जिल्हाधिकारी रवींद्र बिनवडे, जिल्हा परिषदेच्या मुख्य कार्यकारी अधिकारी श्रीमती निमा अरोरा, जिल्हा आरोग्य अधिकारी डॉ. विवेक खतगावकर, शल्यचिकित्सक डॉ.मधुकर राठोड, निवासी वैद्यकीय अधिकारी डॉ संजय कुलकर्णी, तहसीलदार श्रीकांत भुजबळ, कोवीड रुग्णालयाचे प्रमुख डॉ. जगताप उपस्थित होते. यांच्याकडून केंद्रेकर यांनी माहिती घेतली. विशेषकरून जालना शहरात कोवीडच्या आजाराची तपासणी करण्यासाठी प्रयोगशाळेचे बांधकाम सुरू आहे. या बांधकामाचीही त्यांनी आवर्जून पाहणी केली.

नवीन इमारतीची पाहणी करताना विशेष करून जिल्हा शल्य चिकित्सक डॉ. राठोड यांना अडचणी संदर्भात विचारणा केली असता त्यांनी कोणत्याही अडचणी नसल्याचे सांगितले. त्यानंतर या रूग्णालयाच्या सुरू असलेल्या बांधकामाची केंद्रेकर यांनी पाहणी केली. या कामातील दिरंगाईबाबत केंद्रेकर यांनी तीव्र शब्दात नाराजी व्यक्त केली ."या कामाच्या गतीपेक्षा इंदिरा आवास योजनेची घरे लवकर होतात" अशा शब्दात त्यांनी अधिकाऱ्यांना सुनावले. एवढेच नव्हे तर या रुग्णालयात असलेल्या खाटांची संख्या वाढविण्याच्या सूचनाही त्यांनी दिल्या. दरम्यान, या पाहणीनंतर वरीष्ठ अधिकाऱ्यांसोबत विभागीय आयुक्तांनी जिल्हाधिकारी कार्यालयात बैठक घेऊन जिल्ह्याच्या आरोग्याविषयीचा आढावा घेतला.