जालना- बदनापूर तालुक्यातील दरेगाव येथील रोपवन क्षेत्रात अटल घन वन प्रकल्प हाती घेण्यात आला आहे. अवघ्या तीन महिन्यातच या प्रकल्पांतर्गत लावलेल्या झाडांची उंची १० ते १५ फुटापर्यंत गेलेली आहे. त्यामुळे, मुरमाड जमिनीवर देखील एक सुंदर प्रकल्प नावरुपाला आला आहे. १ ऑक्टोबर ते ७ ऑक्टोबर दरम्यान वन्यजीव सप्ताह साजरा करण्यात येतो. त्यानिमित्ताने आज सहाय्यक वनसंरक्षक पुष्पा पवार यांच्या हस्ते या अटल घन वनाचे उद्घाटन करण्यात आले.
माहिती देताना सहाय्यक वनसंरक्षक पुष्पा पवार
बदनापूर वन परिमंडळ अंतर्गत दरेगाव रोपवन येथे साडेचार हजार चौरस मीटर क्षेत्रावर १३ हजार ५०० रोपांची लागवड करण्यात आली आहे. १ जुलै ते १८ जुलै २०२० दरम्यान लागवड केलेल्या या रोपांची उंची अवघ्या ३ महिन्यात १० ते १५ फुटांपर्यंत वाढली आहे. त्यामुळे, हा परिसर निसर्गरम्य दिसत आहे.