खदानीमध्ये पोहायला गेलेल्या तरुणाचा हात अडकल्याने पाण्यात बुडून मृत्यू

भोकरदन तालुक्यातील तीन तरुण चार चाकी वाहनाचा परवाना काढण्यासाठी मंगळवारी दुपारी उपप्रादेशिक परिवहन कार्यालयात आले होते. शेजारी असलेल्या खदानीमध्ये हे तरुण पोहायल गेले व त्यातील एकाचा पाण्यात बुडून मृत्यू झाला.

जालना -आपत्तीमध्ये करावयाच्या उपाययोजना आणि बचाव कार्य याविषयी जनजागृती आणि प्राथमिक प्रशिक्षण देण्याच्या उद्देशाने राष्ट्रीय आपत्ती व्यवस्थापन बल (एनडीआरएफ) हे बुधवारपासून जिल्ह्याच्या दौऱ्यावर आले होते. यातच जालन्याच्या उपप्रादेशिक परिवहन कार्यालयाच्या शेजारी असलेल्या खदानीत बुडालेल्या तरुणाचा मृतदेह काढण्यात यश आले. ही घटना बुधवारी घडली.

भोकरदन तालुक्यातील तीन तरुण चार चाकी वाहनाचा परवाना काढण्यासाठी मंगळवारी दुपारी उपप्रादेशिक परिवहन कार्यालयात आले होते, सर्व कागदपत्रांची पूर्तता झाल्यानंतर संबंधित अधिकाऱ्यासमोर कागदपत्रांवर सही करण्यासाठी ते गेले. मात्र, अधिकाऱ्याला काहीतरी वेगळाच वास आल्यामुळे त्यांनी हे काम थांबविले. दरम्यानच्या काळात या तरुणांनी बाजूलाच असलेल्या खदानीमध्ये आंघोळ करून येण्याचा निर्णय घेतल्याचे सांगण्यात येत आहे. यावेळी हे तिघे जण कपडे काढून खदानीमध्ये उतरले पण दोनच जण बाहेर आले, एक मात्र आलाच नाही. त्यानंतर आरडाओरड सुरू झाली, खदानीच्या बाजूला असलेल्या टेकडीवर मुरूम भरणाऱ्या ट्रॅक्टर चालकांनी देखील आरडाओरड सुरू करून चंदनजिरा पोलिसांना फोन केला. काही क्षणातच पोलीस घटनास्थळी दाखल झाले. त्यानंतर या तरुणाचा शोध घेण्यासाठी जालना नगरपालिकेचे अग्निशमन दल आणि पोलीस प्रशासनाच्यावतीने रात्री दहा वाजेपर्यंत शोधमोहीम चालू होती. शेवटी हतबल होऊन हे सर्च ऑपरेशन थांबविले.

दरम्यानच्या काळात जिल्ह्यामध्ये जनजागृती करण्यासाठी आलेल्या एनडीआरएफच्या टीमला पाचारण करण्यात आले. सुरुवातीला बचाव पथकाला दोन तास काहीच हाती लागत नाही, हे लक्षात आल्यानंतर शेवटच्या टप्प्यात विशेष प्रशिक्षण घेतलेल्या जवानाने ऑक्सीजन सिलेंडर बांधून पाण्यात बुडी घेतली आणि अवघ्या दहा मिनिटातच तरूणाचा मृतदेह हाती बाहेर काढला.

जवानाने दिलेल्या माहितीनुसार, या तरुणाने खदानीमध्ये उडी मारल्यानंतर खदानीत असलेल्या चरीमध्ये याचे हात अडकले आणि ते त्याला बाहेर न काढता आल्यामुळे ही दुर्घटना घडली असावी अशी शक्यता वर्तविली आहे. सुरुवातीच्या दोन तासांमध्ये या जवानांच्या टीमने खदानीमधील पाणी ढवळून काढले होते. जर हात अडकले नसते तर मृतदेह पाण्यावरती आला असता, मात्र अडकलेल्या हातामुळे तो मृतदेह वर आला नाही. दुपारी बारा वाजून 30 मिनिटांनी एनडीआरएफच्या या टीमला हा मृतदेह शोधून काढण्यात यश आले.

हेही वाचा - '...तर त्यावेळी काँग्रेसने मोठी संधी गमावली असेच म्हणावे लागेल'