जालन्यातील 'ते' ४ जवान कोरोनामुक्त; जिल्हा पुन्हा ऑरेंज झोनमध्ये

जालना जिल्ह्यामध्ये एकूण १८ कोरोना रुग्ण आढळले होते. त्यापैकी परतूर येथील एक महिला आणि आज सुट्टी देण्यात आलेले ४ जवान, अशा ५ जणांना सुट्टी देण्यात आली आहे. सध्या रुग्णालयात १२ जणांवर उपचार सुरू आहे.

जालना- काल रेड झोनमध्ये गेलेला जिल्हा आज पुन्हा ऑरेंज झोनमध्ये आला आहे. राज्य राखीव पोलीस बल गट क्रमांक ३ मधील 'सी' तुकडीच्या ५ जवानांना कोरोनाची लागण झाली होती. यापैकी ४ जणांचा अहवाल निगेटिव्ह आल्यामुळे त्यांना आज दुपारी एक वाजेच्या सुमारास कोव्हिड-१९ या शासकीय रुग्णालयातून घरी पाठवण्यात आले. यावेळी रुग्णालयातील सर्व डॉक्टर, परिचारिका व कर्मचाऱ्यांनी सुट्टी मिळालेल्या रुग्णांना टाळ्या वाजवून निरोप दिला.

जिल्ह्यात सध्या कोरोनाबाधित रुग्णांची संख्या ही १७ आहे. त्यामुळे, जिल्हा काल रेडझोनमध्ये गेला होता. मात्र 'सी' तुकडीतील जवानांचे अहवाल निगेटिव्ह आल्यामुळे जालनेकरांना दिलासा मिळाला आहे. राज्य राखीव दलाची ही तुकडी मालेगाव येथे गेली होती. त्यानंतर तुकडीतील ५ जवानांना शासकीय रुग्णालयात दाखल करण्यात आले होते. याच तुकडीतील इतर जवानांना भोकरदनला देखील विलगीकृत करण्यात आले आहे. त्यांचे देखील अहवाल निगेटिव्ह येतील अशी आशा जिल्हा शल्यचिकित्सक मधुकर राठोड यांनी व्यक्त केली आहे.

जालना जिल्ह्यामध्ये एकूण १८ कोरोना रुग्ण आढळले होते. त्यापैकी परतूर येथील एक महिला आणि आज सुट्टी देण्यात आलेले ४ जवान, अशा ५ जणांना सट्टी देण्यात आली आहे. सध्या रुग्णालयात १२ जणांवर उपचार सुरू आहे आणि अन्य एक महिला जी सर्वात सुरुवातीला जालना शहरातील दुखीनगरमध्ये आढळली होती, ही महिलादेखील कोरोना मुक्त झाली आहे. मात्र, असे असले तरीही ती अन्य आजारांनी ग्रस्त असल्याने सामान्य रुग्णालयात उपचार घेत आहे. त्यामुळे, कोरोनाच्या आजारावर जिल्ह्यात उपचार घेणाऱ्या रुग्णांची संख्या सध्या १२ एवढी झाली आहे.

हेही वाचा-लाचेचा पहिला हप्ता घेताना पोलीस हवालदार एसीबीच्या जाळ्यात